Túrik kompanııalary Qazaqstanda 3 myńnan astam jumys ornyn ashady
ASTANA. KAZINFORM – Qasym-Jomart Toqaev pen Rejep Taııp Erdoǵanǵa eki el birlese iske asyryp jatqan birqatar ınvestıtsııalyq joba týraly málimet berildi. Bul týraly Aqordanyń baspasóz qyzmeti habarlady.
Atap aıtqanda:
Abaı oblysynda Miryıldız kompanııasy ken baıytý kombınatyn salýǵa nıetti;
İskefe Holding Almaty qalasynda jelatın shyǵarýdy josparlap otyr;
Orzax Group Túrkistan oblysynda bıologııalyq belsendi qospalar shyǵaratyn zamanaýı óndiristi qolǵa aldy;
S Sistem Lojistik kompanııasy «Qazposhta» aktsıonerlik qoǵamymen birlesip, Aqtóbe halyqaralyq áýejaıy aýmaǵynda logıstıka ortalyǵyn salyp jatyr;
Tiryaki Holding Astanada bıdaı men asburshaqty tereń óńdeıtin zaýyt qurylysyna kiristi.
Atalǵan jobalar aıasynda elimizge 920 mıllıon dollardan astam ınvestıtsııa tartylyp, 3100-den asa jumys orny ashylmaq.
Premer-mınıstrdiń orynbasary Serik Jumanǵarın memleketter basshylaryna búginde túrik kompanııalarynyń qatysýymen el ekonomıkasynyń túrli sektorynda 100-ge jýyq ınvestıtsııalyq joba júzege asyrylǵanyn baıandady. Olardyń jalpy somasy – 4 mıllıard dollar shamasynda.
Qazirgi kezde quny 4 mıllıard dollardy quraıtyn taǵy 50 birlesken jobaǵa qatysty jumys jalǵasýda. Bul Qazaqstan men Túrkııanyń ınvestıtsııalyq yqpaldastyǵy qarqyndy damyp kele jatqanyn kórsetedi.
Aıta ketelik Qasym-Jomart Toqaev pen Rejep Taııp Erdoǵan Qazaqstan – Túrkııa Joǵary deńgeıdegi strategııalyq yntymaqtastyq keńesiniń altynshy otyrysyn ótkizgen edi.
