Túrik kofesi Eýropalyq Odaqtan mádenı mura mártebesin aldy

ASTANA. KAZINFORM — Eýropalyq Odaq túrik kofesine Traditional Speciality Guaranteed (TSG) — «Kepildendirilgen dástúrli mamandaný» mártebesin resmı túrde berdi, dep habarlaıdy Kazinform agenttiginiń menshikti tilshisi.

Bul — Túrkııanyń eýropalyq dástúrli ónimder tizilimine alǵash ret engizilgen ónimi bolyp otyr. Bul sheshim túrik kofesiniń biregeıligi men mádenı mańyzyn aıqyndaıdy.

Túrik kofesi — shyǵys qonaqjaılyǵy men baıaý áńgimelerdiń hosh ıisti sımvoly. Endi ol Eýropalyq Odaq tarapynan laıyqty moıyndaýǵa ıe boldy. TSG mártebesi — dástúrli daıyndalý tásilin jáne erekshe mádenı mánin saqtaǵan ónimderge beriletin ataq.

Túrkııa Saýda jáne bırjalar odaǵynyń málimdeýinshe, túrikshe daıyndalǵan kofe — jaı ǵana sýsyn emes, ulttyq bolmystyń bir bóligi. Onyń tarıhy XVI ǵasyrǵa, ıaǵnı kofe alǵash ret Ystambulda paıda bolǵan kezeńge deıin barady. Ol tez arada Osman saraılaryndaǵy saltanatty qabyldaýlar men qalanyń qarapaıym kóshe kofehanalarynyń ajyramas bóligine aınalǵan.

Túrik kofesin daıyndaý — shydam men sheberlikti qajet etetin óner. Maıda untaqtalǵan kofe dánderi mys «djezve» ne «túrik» dep atalatyn ydysta baıaý otta qaınatylady, ústinde qoıý kóbik paıda bolǵansha. Daıyn kofe shaǵyn shynyaıaqtarda, ádette bir stakan sýmen jáne bir tilim raqat-lýkýmmen birge usynylady.

Eýropalyq Odaqtyń bul sheshimimen túrik kofesi endi jaı ǵana tanymal sýsyn emes, resmı túrde mádenı mura mártebesin ıelendi.

Bul — Túrkııa úshin óz dástúrine degen qurmettiń jáne ulttyq aspazdyq mádenıetin álemdik deńgeıde ilgeriletýdiń mańyzdy qadamy.

Túrikterdiń óz sózimen aıtqanda: «Bir kahvenin kırk yıl hatırı vardır» — «Bir shynyaıaq kofe qyryq jyldyq estelik syılaıdy».

Endi bul estelik te Eýropalyq muranyń bir bóligine aınaldy.

Eske sala keteıik, buǵan deıin Dýbaıda eń qymbat bir shynyaıaq kofe daıyndalǵanyn jazǵan edik.