Túrki ınvestıtsııalyq qorynyń jumysy resmı túrde iske qosylady
ASTANA. KAZINFORM – Osy jyly 17-18 mamyrda Ystanbulda QR Premer-Mınıstriniń orynbasary – Ulttyq ekonomıka mınıstri Nurlan Baıbazarovtyń qatysýymen Túrki ınvestıtsııalyq qoryna basqarýshy múshe elder Keńesiniń (TIQ) alǵashqy ınaýgýratsııalyq otyrysy ótedi. Ol Qordyń basqarýshylar Keńesine Qazaqstannyń ókili retinde endi.
«Kezdesýdiń negizgi maqsaty – Túrki ınvestıtsııalyq qorynyń jumysyn resmı túrde iske qosý, ony basqarýǵa qatysty tıisti sheshimder qabyldaý, sondaı-aq quryltaıshy elder arasyndaǵy ekonomıkalyq baılanystardy nyǵaıtý jáne ornyqty damýdy qoldaý», - dedi Syrtqy ister mınıstrliginiń resmı ókili Aıbek Smadııarov mınıstrlikte ótken aptalyq baspasóz máslıhatynda.
2015 jylǵy 11 qyrkúıekte Astana qalasynda ótken Túrkitildes memleketter yntymaqtastyǵy keńesi memleket basshylarynyń V sammıtinde qazaqstandyq tarap Túrki ıntegratsııasy qoryn qurýdy usyndy. Qordyń maqsaty – óńirishilik saýdany keńeıtý jáne ekonomıkalyq qyzmetti qoldaý arqyly Túrki memleketteri uıymyna múshe elderdiń ekonomıkalyq damýyna járdemdesý.
Eske salsaq byltyr kúzde QR Parlamenti Senaty «Túrki ınvestıtsııalyq qoryn qurý týraly kelisimdi ratıfıkatsııalaý týraly» Zańyn maquldady.
Qor qurý týraly kelisimge 2023 jylǵy 16 naýryzda Túrki memleketteriniń uıymyna (TMU) múshe memleketter basshylarynyń sammıti aıasynda qol qoıyldy.
Qordyń jarǵylyq kapıtaly 500 mln dollar kóleminde bolmaq. Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetine qaraǵanda, qordyń jarǵylyq kapıtaly jalpy nomınaldy quny 350 mln AQSh dollaryn quraıtyn tólengen aktsııalarǵa, sondaı-aq nomınaldy quny 150 mln AQSh dollaryn quraıtyn tartylatyn aktsııalarǵa bólinedi. Qorǵa árbir múshe memleketke 70 mln AQSh dollaryn quraıtyn tólengen aktsııadan keledi.
