Túrki ınvestıtsııalyq qorynyń mańyzy artyp keledi – Serik Jumanǵarın
ASTANA. KAZINFORM – Atalǵan qor tek qarjylyq ınstıtýt bolyp qana qoımaı, saýdany damytatyn, jańa salalar quratyn, ınvestıtsııalyq seriktestikti keńeıtetin alańǵa aınalýy tıis. Bul jóninde QR Premer-mınıstriniń orynbasary – Ulttyq ekonomıka mınıstri Serik Jumanǵarın málimdedi.
Ol «Túrki memleketteri uıymy elderiniń ekonomıkalyq ıntegratsııasy jáne yntymaqtastyǵy: óndiris, agroónerkásiptik keshen, logıstıka jáne tsıfrovızatsııa salalaryndaǵy jańa múmkindikter» bıznes forýmynda atalǵan taqyrypqa toqtaldy.
– Qazaqstan túrki memleketteriniń arasyndaǵy ekonomıkalyq ıntegratsııany damytýdy árdaıym qoldap keledi. Bizdińshe, óndiristi, agroónerkásiptik keshendi, kólik-logıstıkalyq dálizderdi, tsıfrlyq platformalardy jáne elektrondyq kommertsııany birlesip órkendetýge aıtarlyqtaı áleýet bar, – dedi Serik Jumanǵarın.
Sol sebepti, onyń aıtýynsha Túrki ınvestıtsııalyq qorynyń mańyzy arta túsýde.
– Biz Túrki ınvestıtsııalyq qoryn TMU músheleriniń ortaq jobalaryn qarjylandyratyn negizgi mehanızm retinde qarastyramyz. Óndiris, ınfraqurylym, agroónerkásiptik keshen, logıstıka jáne tsıfrovızatsııa salalaryndaǵy naqty bastamalardy iske asyrý kezeńine kóshý kerek, – dedi Premer-mınıstrdiń orynbasary.
Onyń málimdeýinshe, atalǵan qor qazirdiń ózinde keı jobalardy qolǵa alǵan. Máselen, Almaty Halyqaralyq áýejaıyn ınfraqurylymdyq turǵyda damytýdy qarjylandyrý jóninde kelissózder júrip jatyr.
– Túrki ınvestıtsııalyq qory tek qarjylyq ınstıtýt bolyp qana qoımaı, saýdany damytatyn, jańa salalar quratyn, ınvestıtsııalyq seriktestikti keńeıtetin alańǵa aınalýy tıis. Bul Qazaqstan úshin aıryqsha mańyzdy, – dedi vıtse-premer.
Aıta keteıik, buǵan deıin Serik Jumanǵarınnyń Túrki memleketteri uıymyndaǵy yntymaqtastyqty damytýdyń mańyzy jónindegi málimdemesin jarııalaǵanbyz.
