Túrki ınvestıtsııalyq qory Dúnıejúzilik banktiń RAMP jelisine qosyldy
ASTANA. KAZINFORM – Túrki ınvestıtsııalyq qory (TIF) Dúnıejúzilik bank toby qazynashylyǵynyń «Rezervter boıynsha keńes berý jáne basqarý seriktestigi» (RAMP) jelisine qosyldy.
Vashıngtonda qol qoıylǵan kelisim aıasynda taraptar qurylymdyq jáne uzaq merzimdi seriktestik týraly kelisti.
Jelige qatysý qorǵa ótimdilik, táýekel jáne qazynashylyqty basqarý salasyndaǵy halyqaralyq tájirıbelerge, sondaı-aq Dúnıejúzilik banktiń tehnıkalyq quraldary men jahandyq tájirıbesine qol jetkizýge múmkindik beredi.
Bul yntymaqtastyq sonymen qatar TIF-ke aımaqtyq damý ınstıtýty retindegi tájirıbesimen bólisýge múmkindik beredi.
Túrki ınvestıtsııalyq qorynyń bas dırektory Ramıl Babaevtyń málimdeýinshe, yntymaqtastyq qazynashylyq fýnktsııasy úshin berik negiz qalaýǵa kómektesedi.
Óz kezeginde Dúnıejúzilik banktiń ókili Horhe Famılıar TIF-tiń qosylýy ınvestorlar úshin seriktestiktiń mańyzdylyǵy artyp kele jatqanyn tanytatynyn atap ótti.
Eske salaıyq, Túrki ınvestıtsııalyq qory óz jumysyn 2024 jylǵy mamyrda bastady. Sol ýaqytta onyń kapıtaly 500 mln dollar kóleminde belgilengen edi.
Túrki ınvestıtsııalyq qoryn qurý týraly kelisimge 2023 jyldyń 16 naýryzynda Ankarada ótken Túrki memleketteri uıymynyń kezekten tys sammıti aıasynda qol qoıylǵan bolatyn. Quryltaıshy elder qatarynda Qazaqstan, Ázerbaıjan, Qyrǵyzstan, Ózbekstan jáne Túrkııa bar.
Túrki ınvestıtsııalyq qorynyń kapıtaly 600 mln dollarǵa deıin ulǵaıatynyn jazǵan bolatynbyz.
