Túrki memleketteri uıymy 16 jylda 40-qa jýyq salada yntymaqtastyq ornatty
ASTANA. KAZINFORM — 2025 jylǵy 3 qazan Túrki memleketteri yntymaqtastyq kúni jáne tarıhı Nahchyvan kelisiminiń 16 jyldyǵy retinde keń kólemde merekelendi.
Túrki memleketteri uıymynyń Bas hatshysy Kýbanychbek Omýralıev quttyqtaý hatynda uıymnyń osy ýaqyt aralyǵynda jetken zor jetistikteri men damý baǵyttaryna toqtaldy. Bas hatshynyń aıtýynsha, sońǵy on alty jyldyń ishinde Túrki memleketteri uıymy jan-jaqty yntymaqtastyqtyń keshendi alańyna aınaldy. Uıym bastapqyda birneshe salany qamtyǵan bolsa, qazirgi tańda ekonomıka, kólik, keden, energetıka, aýyl sharýashylyǵy, bilim, mádenıet, densaýlyq saqtaý, jastar jáne sport, tsıfrlandyrý, ınnovatsııa, ekologııa jáne qaýipsizdik sekildi 40-qa jýyq salada jan-jaqty yntymaqtastyq ornatylǵan.
— Bul damý ortaq baǵytymyzdy naqty iske aınaldyrýǵa, ortaq tarıh pen mádenı baılanystarymyzdy yntymaqtastyq pen órkendeýdiń naqty quralyna aınaldyrýǵa degen ujymdyq erik-jigerimizdiń aıqyn kórinisi. Atalǵan jetistikter memleket basshylarynyń kóregen ustanymy men Syrtqy ister mınıstrleriniń, sondaı-aq uıym músheleriniń jáne baqylaýshy elderiniń belsendi eńbeginiń arqasynda múmkin boldy, — dep atap ótti Bas hatshy.
Sonymen qatar Omýralıev ótken jylǵy Qyrǵyzstannyń tóraǵalyǵy aıasynda atqarylǵan jumystarǵa alǵysyn bildirip, aldaǵy 2025 jylǵy qazan aıynda Ázerbaıjannyń tóraǵalyǵynda ótetin memleket basshylarynyń 12-shi sammıtine daıyndyqty atap ótti. Bul sammıt yntymaqtastyqty odan ári nyǵaıtýǵa jáne jańa baǵyttardy damytýǵa serpin beredi dep kútilip otyr.
Onyń sózinshe, Túrki memleketteri uıymy saıası dıalogty tereńdetip, ekonomıkalyq baılanystardy keńeıtip, mádenı almasýdy arttyrý arqyly halyqaralyq arenada ortaq múddelerdi qorǵaýda mańyzdy ról atqaryp keledi.
Bas hatshy Kýbanychbek Omýralıev Túrki memleketteri yntymaqtastyq kúnimen uıymǵa múshe jáne baqylaýshy elderdiń halyqtary men úkimetterin shyn júrekten quttyqtap, uıymnyń bolashaǵy jarqyn, birligi berik bolýyn tiledi.
Aıta keteıik, 6-7 qazanda Ázerbaıjannyń Gabala qalasynda Túrki memleketteri uıymynyń XII sammıti ótedi. Munda memleket basshylary saıası usynysyn aıtyp, túrki memleketteriniń ortaq máselelerin talqylamaq. Talqy alańynda ne aıtylýy múmkin, uıym qurylǵaly nendeı nátıjege qol jetti? Kazinform-nyń analıtıkalyq sholýshysy sarapshylarmen birge saýaldarǵa jaýap izdedi.