Túrki ıntegratsııasynyń XXI ǵasyrdaǵy modelin qalyptastyrýymyz kerek – Qanat Sharlapaev
ASTANA. KAZINFORM – Tarıhı baılanysty osy zamanǵa laıyqtaý mańyzdy. Bul jóninde Túrki memleketteriniń saýda-óndiristik palatalary odaǵynyń tóraǵasy, «Atameken» QR UKP prezıdıým tóraǵasy – basqarma tóraǵasy Qanat Sharlapaev málimdedi.
Ol «Túrki memleketteri uıymy elderiniń ekonomıkalyq ıntegratsııasy jáne yntymaqtastyǵy: óndiris, agroónerkásiptik keshen, logıstıka jáne tsıfrovızatsııa salalaryndaǵy jańa múmkindikter» bıznes forýmynda atalǵan taqyrypqa toqtaldy.
– Ótken dáýirlerde bizdiń aımaqtyń ekonomıkalyq mańyzy zor boldy. Bul kezdeısoqtyq ne ásheıin sáttilik emes edi. Kerisinshe, saýatty júrgizilgen turaqty saıasattyń, damyǵan naryqtyń, belsendi túrde tehnologııa almasýdyń nátıjesinde sondaı jaǵdaı qalyptasty. Odan bólek, sol kezdegi kelissóz júrgizýdiń joǵary mádenıeti de áser etti, – dedi Qanat Sharlapaev.
Degenmen qazir ótken shaq jóninde sóz qozǵap qana otyrýǵa bolmaıdy.
– Osy tarıhı baılanysty óz zamanymyzǵa laıyqtap, naqty tsıfrlyq algorıtmder men ınvestıtsııalyq mehanızmderge aınaldyrýǵa tıispiz. Bizdiń mindetimiz – keshegi kúnge toqmeıilsimeı, túrki ıntegratsııasynyń XXI ǵasyrdaǵy ómirsheń ári básekege qabiletti modelin qalyptastyrý, – dedi ol.
Aıta keteıik, buǵan deıin Túrki ınvestıtsııalyq qorynyń mańyzy artyp kele jatqanyn jazǵanbyz.
