Túrki halyqtary Silk Way Star arqyly birligin bekemdep jatyr - Aıgúl Nadırova

ASTANA. KAZINFORM – Silk Way Star baıqaýy túrki tildes elder basshylarynyń bastamalarymen úndes. Silk Way Star mýzykalyq jobasynyń ádilqazylar múshesi, Ózbekstannyń halyq ártisi Aıgúl Nadırova osylaı dedi.

— Maǵan alǵash Qazaqstanda ótetin 12 elden ónerpazdar synǵa túsetin baıqaýda ádilqazy bolasyz degende shyn qýandym. Bul bárimizge óte qajet joba, sebebi ol túrki halyqtaryn biriktire túsedi. Sondyqtan onyń keleshegi zor dep sanaımyn, - dedi ánshi Jibek Joly telearnasyndaǵy «Bugin Live» baǵdarlamasynda.

Sondaı-aq ol tóreshi retinde ónerpazdardy qalaı baǵalaıtynyn atap ótti.

— Óz elimde elishilik deńgeıdegi baıqaýlarǵa qazylyq ettim. Al bul halyqaralyq joba bolǵandyqtan men úshin jańa tájirıbe, sebebi basqa eldiń ónerpazdarymen, olardyń ádis-tásilderi, sahnaǵa shyǵýy, jumys isteýimen tanysyp jatyrmyn. Sondaı-aq 12 elden kelgen tóreshilerdiń de jumysyn jiti qadaǵalap otyrmyn. Bul áýeli vokaldyq baıqaý bolǵandyqtan birinshi kezekte onyń daýys tehnıkasyna, tembrine mán beremin. Sosyn ózin sahnada ustaýyna, ándi tyńdarmanǵa jetkize alýyna qaraımyn, - dedi Aıgúl Nadırova.

Odan bólek ádilqazy bul tek óner baıqaýy emes, sonymen qatar túrki halyqtary arasyndaǵy mádenı kópir ekenin aıtty.

— Sondyqtan Silk Way Star mýzykalyq jobasynyń saıası turǵyda máni zor. Bul baıqaýǵa negizinen túrkitildes halyqtardan úmitkerler qatysyp jatyr. Biz sonaý kóne zamanda bir halyq boldyq. Biz qashan da birlikte boldyq. Osy joba arqyly sol birligimizdi bekemdep jatyrmyz. Qazir bizdiń elderimizdiń basshylary ózara dostyqta bolý úshin kóptegen birlesken jobalardy jasap jatyr. Al bul baıqaý sol jobalarmen úndes ári qosymsha bir lep ákeledi dep sanaımyn, - dedi ol.

Eske sala keteıik, baıqaýda Qazaqstan atynan ánshi Alem óner kórsetip jatyr.

Buǵan deıin ádilqazylar múshesi Samıra Efendı bul baıqaý birden 12 elge tanylýǵa múmkindik beretin joba dep ataǵan edi.