Túrki elderiniń jas ónertapqyshtary Astanada baq synap jatyr
ASTANA. KAZINFORM — Búgin mektep oqýshylary arasyndaǵy halyqaralyq Robotek Grand Tournament Astana 2026 chempıonaty bastaldy. Bıyl besinshi ret uıymdastyrylyp otyrǵan aýqymdy jarysqa Qazaqstannyń barlyq óńirinen jáne túrki memleketterinen kelgen jas ınjenerler qatysyp jatyr.
Eki kúnge sozylatyn týrnırge jalpy 220 komanda tirkelgen. Onyń 45-ten astamy Túrkııa, Ázerbaıjan, Ózbekstan, Qyrǵyzstan, Túrikmenstan jáne Tájikstannan kelgen komandalar.
Chempıonat barysynda oqýshylar ózderi qurastyrǵan ári baǵdarlamalaǵan robottaryn túrli tapsyrmalar boıynsha jarystyrady. Qatysýshylar robot jarysy, zattardy suryptaý, kedergilerden ótý, dáldik tapsyrmalary men ınjenerlik jobalar baǵyttarynda synǵa túsedi. Bıyl týrnır 9 baǵyt boıynsha uıymdastyrylǵan. Al búgin tórt sanatta ózara baq synady.
Robotek Grand Tournament Astana 2026 uıymdastyrýshysy Sanjar Shalqarbekovtiń aıtýynsha, robototehnıkaǵa qyzyǵýshylyq tanytyp júrgen balalar sany jyl saıyn artyp keledi.
— Chempıonat qatysýshylarynyń 30 paıyzy aýyldyq jerlerden kelgen. Taǵy 30 paıyzy oblys ortalyqtarynan qatysyp jatyr. Sonymen qatar jarysta baq synaıtyn jas ınjenerlerdiń 10 paıyzy — qyz balalar. Biz robototehnıka men STEM bilim berý salasyndaǵy genderlik stereotıpterdi joıyp, qyzdardyń osy baǵytqa qyzyǵýshylyǵyn arttyrýǵa erekshe kóńil bólip jatyrmyz, — dedi ol.
Jarysqa qatysýshylardyń biri, 7-synyp oqýshysy Ábilmansur Quramys. Ol dosy Tamerlan Beketovpen birge Aqtóbe oblysynan kelgen. Jas ınjenerler qurylǵyny ózderi baǵdarlamalap, túrli datchıkter arqyly basqarady.
— Robotta jaryq datchıgi bar. Ol kýbıkke barǵan kezde onyń qaı jerde turǵanyn anyqtaıdy. Ol úshin biz kompıýter arqyly programma jazamyz. Al basqarý paneli arqyly robottyń programmalaryn qosyp, engizemiz. Bul robotty 2 kúnde EV3 konstrýktorlarynan qurastyryp shyǵardyq, — deıdi chempıonat qatysýshysy.
Chempıonat aıasynda «Úzdik aýyl komandasy», «Úzdik sheteldik komanda», «Úzdik ınjenerlik sheshim» jáne «Úzdik qyzdar komandasy» sekildi arnaıy nomınatsııalar qarastyrylǵan. Sondaı-aq jeńimpazdarǵa seriktes joǵary oqý oryndarynyń bilim granttary tabystalady. Osylaısha halyqaralyq týrnır jas ónertapqyshtardyń ınjenerlik qabiletin shyńdap qana qoımaı, olardyń bolashaq mamandyq tańdaýyna da múmkindik bermek.
Eske sala keteıik, qazaqstandyq oqýshylar ekologııalyq máselelerdi sheshýge arnalǵan sýasty robotyn jasady.
