Túrki elderiniń teatrlary ortaq tsıfrlyq platforma men halyqaralyq jazǵy mektep qurýdy usyndy
ASTANA. KAZINFORM — Túrki elderiniń teatr basshylary ortaq tsıfrlyq platforma, teatr jýrnaly men halyqaralyq jazǵy mektep qurýdy usyndy. Bul týraly Kazinform agenttiginiń Ankaradaǵy menshikti tilshisi habarlady.
Ózbekstanda IV Halyqaralyq TÚRKSOI teatr festıvali aıasynda túrki álemi teatrlary basshylarynyń kezdesýi ótti. Qatysýshylar kásibı baılanystardy nyǵaıtý, tájirıbe almasý jáne birlesken mádenı jobalardy júzege asyrý máselelerin talqylady.
Kemal Gózdiń moderatorlyǵymen ótken kezdesýge Ózbekstan mádenıet mınıstriniń birinshi orynbasary Nodırbek Saıfýllaev, TÚRKSOI bas hatshysy Sultan Raev, sondaı-aq Qazaqstan, Ázerbaıjan, Qyrǵyzstan, Túrikmenstan jáne Ózbekstan teatrlarynyń ókilderi qatysty.
Sultan Raev óńirdegi teatrlar arasyndaǵy baılanysty nyǵaıtý qajet ekenin aıtty. Onyń aıtýynsha, táýelsizdik alǵanyna kóp jyl ótse de, túrki elderiniń teatr ujymdary bir-biriniń shyǵarmashylyǵymen áli de jetkilikti deńgeıde tanys emes. Ol festıvaldiń negizgi mindetteriniń biri kásibı tájirıbe almasýdy damytý jáne ulttyq dramatýrgııany halyqaralyq sahnada nasıhattaý ekenin aıtty.
Kezdesý barysynda qatysýshylar yntymaqtastyqty nyǵaıtýǵa baǵyttalǵan birqatar bastama usyndy. Ázerbaıjan memlekettik pantomıma teatrynyń dırektory ıArmammed Qurbanov spektaklder, jobalar men teatr ujymdary týraly aqparat jarııalanatyn ortaq elektrondy platforma qurýdy usyndy.
Qazaqstandyq teatr synshysy Beıbit Bahtygerev teatr ónerine arnalǵan TÚRKSOI jýrnaly men almanahyn shyǵarýdy usyndy. Sondaı-aq ol festıvalder baǵdarlamasyn jas rejısserler men tehnıkalyq mamandarǵa arnalǵan bilim berý sharalarymen tolyqtyrý bastamasyn kóterdi.
Shyńǵys Aıtmatov atyndaǵy Osh jastar teatrynyń dırektory Zarylyk Talasbek ýýlý túrki áleminiń halyqaralyq jazǵy teatr mektebin uıymdastyrýdy usyndy. Joba aıasynda ártúrli elderdiń ókilderi shyǵarmashylyq toptarǵa birigip, birlesken qoıylymdar ázirleı alady. Qyrǵyz tarapy mektep kezeńderiniń birin Osh qalasynda ótkizýge daıyn ekenin bildirdi.
Kezdesý qorytyndysy boıynsha qatysýshylar usynylǵan bastamalardy jınaqtap, odan ári qarastyrý úshin ortaq qujat ázirleýge kelisti. Bul usynystar túrki elderi teatrlary arasyndaǵy birlesken qoıylymdardy, kásibı tájirıbe almasýdy jáne mádenı yntymaqtastyqty damytýǵa baǵyttalǵan.
Eske salaıyq, buǵan deıin Ándijanda TÚRKSOI halyqaralyq teatr festıvali ashylǵanyn habarlaǵanbyz.
