Túrki elderiniń ortalyq bankter keńesiniń alǵashqy otyrysy Astana halyqaralyq forýmy aıasynda ótedi

ASTANA. KAZINFORM – Túrki memleketteri uıymynyń (TMU) bas hatshysy Kýbanychbek Omýralıev Kazinform agenttiginiń tilshisine bergen eksklıýzıvti suhbatynda keńes barysynda kóteriletin taqyryptar týraly aıtyp berdi. 

Bishkekte Túrki memleketter uıymynyń XI sammıti aıasynda Túrki ortalyq bankter keńesin qurý týraly memorandýmǵa qol qoıyldy. Bul bastamany Qazaqstan Prezıdenti kóterdi. Onyń maqsaty TMU-ǵa múshe elderdiń ortalyq bankteri arasyndaǵy tıimdi yntymaqtastyqty nyǵaıtý, qarjylyq turaqtylyqty qamtamasyz etý, tólem júıelerin damytý jáne tsıfrlyq qarjylyq jańalyqtardy engizý.

Bul bastamany barlyq qatysýshy eldiń basshylary biraýyzdan qoldady. Memorandýmǵa Ázerbaıjan, Qazaqstan, Qyrǵyzstan, Túrkııa jáne Ózbekstannyń ortalyq bankteriniń tóraǵalary qol qoıdy.

Keńes músheleri aqsha-nesıe saıasaty, qarjylyq turaqtylyq, tólem júıelerin damytý, qarjylyq tehnologııalar jáne ózara qyzyǵýshylyq týdyratyn basqa da salalar boıynsha pikir jáne tájirıbe almasyp, birlesken konsýltatsııalar men zertteýler júrgizetin bolady.

Keńestiń alǵashqy otyrysy jaqyn arada Astana halyqaralyq forýmy aıasynda ótedi.

— Otyrys barysynda múshe memleketterdiń ekonomıkalyq jaǵdaıy, aqsha-nesıe saıasatynyń negizgi baǵyttary, qarjylyq turaqtylyqty qamtamasyz etý sharalary, tólem júıelerin damytý, ortalyq bankterdiń tsıfrlyq valıýtalaryn engizý keleshegi, qarjylyq tehnologııalar salasyndaǵy yntymaqtastyq jáne basqa da taqyryptar talqylanady. Osylaısha, keńes qarjy salasyndaǵy saıasatty úılestirýdiń turaqty alańyna aınalady. Bul óz kezeginde TMU elderiniń makroekonomıkalyq turaqtylyǵy men ózara ekonomıkalyq baılanysyn kúsheıtedi, — dedi TMU bas hatshysy Kýbanychbek Omýralıev.

Aıta ketelik búgin Prezıdent Túrki memleketteri uıymynyń beıresmı sammıtine qatysty. Túrki memleketteri uıymynyń beıresmı sammıtinde birqatar qujat qabyldandy.