Túrki elderiniń kompozıtorlary kásibı odaq qurdy
ASTANA. KAZINFORM – Túrki elderiniń jetekshi mýzykalyq uıymdarynyń ókilderi Túrki álemi kompozıtorlary odaǵyn (Turkic Union of Composers, TUC) qurdy.
Túrki álemi kompozıtorlary odaǵyn qurý týraly sheshim 19 qyrkúıekte Bakýde ótken Túrki álemi kompozıtorlarynyń I quryltaıy aıasynda qabyldandy. Bul týraly Túrki mádenıeti jáne murasy halyqaralyq qorynyń prezıdenti Aqtoty Raıymqulova habarlady.
Quryltaı barysynda túrki elderiniń jetekshi mýzykalyq uıymdarynyń ókilderi Baký deklaratsııasyna qol qoıdy. Qujat mýzyka óneri salasyndaǵy kásibı yntymaqtastyqty damytýǵa negiz qalaıdy.
– Jańa odaq túrki elderiniń kompozıtorlaryn, mýzykatanýshylaryn, oryndaýshylaryn, konservatorııalaryn, mýzyka akademııalary men shyǵarmashylyq birlestikterin biriktirýdi kózdeıdi, – delingen málimette.
Túrki álemi kompozıtorlary odaǵy sala mamandary arasyndaǵy kásibı baılanysty nyǵaıtýǵa jáne mýzykalyq óner salasyndaǵy yntymaqtastyqty damytýǵa baǵyttalǵan.
Aıta keteıik, túrki elderi jasandy ıntellekt pen tsıfrlyq qaýipsizdik máselelerin talqylady.
