Túrki elderiniń Kıberqaýipsizdik jónindegi keńesi qaýiptiń aldyn alýǵa yqpal etedi — Prezıdent
ASTANA.KAZINFORM — Búgin Túrki memleketteri uıymynyń beıresmı sammıtinde Prezıdent Qasym-Jomart Toqaev Kıberqaýipsizdik jónindegi keńestiń mańyzdylyǵyn aıtty.
Memleket basshysy Gabalada ótken basqosýda tsıfrlyq damý jáne kıberqaýipsizdikke qatysty birqatar bastama kótergenin eske saldy
— Atap aıtqanda, Túrki memleketteri uıymynyń Tsıfrlyq monıtorıng jáne Tsıfrlyq ınnovatsııalar ortalyqtaryn qurýdy usyndym. Bul ortalyqtar Uıymǵa múshe memleketterdiń ósip-órkendeýine tsıfrlyq turǵydan tyń múmkindikter beredi. Budan bólek, sol alqaly jıynda Kıberqaýipsizdik jónindegi keńes qurý qajet ekenin aıttym. Mundaı Keńes elderimizdiń tsıfrlyq álemindegi osal tustardy anyqtap, ınfraqurylymǵa tónetin qaýiptiń aldyn alýǵa yqpal etedi. Osy qurylym arqyly Uıymǵa múshe elderdiń tıisti organdary jedel aqparat almasa otyryp, jumys isteı alady. Qazaqstan bul bastamalar boıynsha tıisti tujyrymdamalardy ázirlep, Uıymǵa múshe memleketterge kelisý úshin joldady, — dedi Qasym-Jomart Toqaev.
Memleket basshysynyń sózine qaraǵanda, atalǵan naqty sharalardyń bári de elderimizdiń ortaq múddesine saı keledi.
— Sondyqtan osy baǵytta tıimdi jáne belsendi áreket etemiz dep oılaımyn, — dedi Prezıdent.
Budan buryn habarlanǵandaı, Búgin Túrkistan qalasynda Prezıdent Qasym-Jomart Toqaevtyń qatysýymen Túrki memleketteri uıymynyń beıresmı sammıti bastaldy. Sammıtke TMU-ǵa múshe memleketterdiń basshylary — Túrkııa prezıdenti Rejep Taııp Erdoǵan, Ózbekstan prezıdenti Shavkat Mırzıeev pen Qyrǵyzstan prezıdenti Sadyr Japarov, Ázerbaıjan prezıdenti Ilham Álıev keldi.
«Jasandy ıntellekt jáne tsıfrlyq damý» taqyrybyna arnalǵan jıyn Qazaqstannyń tóraǵalyǵymen uıymdastyrylyp otyr.
Aıta keteıik, Memleket basshysy Túrki órkenıeti ortalyǵyn qurý týraly sheshim qabyldady.
