Túrki elderiniń qarjy ınvestıtsııalyq qory qurylmaq

Ekonomıkalyq jobalardy qarjylandyrýǵa baǵyttalatyn túrki memleketteriniń qarjy qoryn qurý týraly shart ratıfıkatsııalandy, dep habarlaıdy QazAqparat tilshisi. 

«Túrki memleketteriniń yntymaqtastyǵy álemniń týrbelenttik jaǵdaıyndaǵy altyn kópir dep atappyz. Bunyń maǵynasy keń. Osydan 15-20 jyl buryn bizdi synaıtyn, jaqtyrmaıtyn adamdar Ortalyq Azııa elderiniń birigýinen eshteńe shyqpaıdy deıtin. Olardyń múddeleri eshqashan toǵyspaıdy, sý, shekara máselesin sheshe almaıdy degen. Túrki birligine keler bolsaq, bul jerde de sol áńgime. Bul memleketter árqaısysy óz baǵytymen damyp kele jatyr. Túrki memleketteri tek tarıh, mádenıet turǵysynan aspaıdy degen áńgimeler aıtyldy. Odan beri talaı zaman ótti. Geosaıası jaǵdaılar, tóngen qaýipter bizdiń esimizdi jıyp, ósýimizge alyp keldi. Úlken qadamdar jasaldy», - dedi Májilis depýtaty Aıdos Sarym elordada ótip jatqan túrki memleketteri uıymyna múshe elder ókilderimen kezdesýde.

Onyń aıtýynsha, kezinde Túriksoı, Túrki akademııasy sekildi qurylǵan uıymdar búginde saıası formatqa aınaldy.

«Odan bólek, TúrikPA uıymy qurylyp, óz jumysyn belsendi kórsete bastady. Bul – úlken jańalyq. Keshe ǵana Parlament túrki dúnıesiniń alǵash ekonomıkalyq qarjylyq ınstıtýty túrki qarjy ınvestıtsııalyq qoryn qurý týraly sheshimdi ratıfıkatsııalady. Alǵashqy ýaqytta bul uıymnyń qarjysy 500 mln AQSh dollary bolsa6 bolashaqta artyp, naqty ekonomıkalyq jobalardy qarjylandyrýǵa jumsalady. Dál osy sııaqty jetistikterdi Ortalyq Azııa elderi boıynsha da keltirýge de bolady», - deıdi ol.

Aıta keteıik, búgin Astanada túrki memleketteri uıymyna múshe jáne baıqaýshy memleketterdiń resmı syrtqy saıası zertteýler ortalyqtarynyń 9 kezdesýi ótip jatyr.