Túrki elderi Túrkistan sammıti aldynda ıntegratsııany kúsheıtýge nazar aýdardy
ASTANA. KAZINFORM — 5-shi Antalııa dıplomatııalyq forýmy aıasynda Qazaqstan Respýblıkasynyń Syrtqy ister mınıstri Ermek Kósherbaev Túrki memleketteri uıymy Syrtqy ister mınıstrleri keńesiniń (TMU SІMK) beıresmı otyrysyna qatysty, dep habarlaıdy QR SІM baspasóz qyzmeti.
Otyrys barysynda taraptar halyqaralyq jáne óńirlik kún tártibindegi ózekti máselelerdi, sonyń ishinde Taıaý Shyǵystaǵy ahýaldy ýshyqtyrmaý jónindegi kúsh-jigerdi talqylady.
Mınıstrler óńirdegi jaǵdaıdyń odan ári damýy jáne ony turaqtandyrýdyń yqtımal joldary jóninde pikir almasty.
Óz sózinde E. Kósherbaev Qazaqstan Respýblıkasynyń beıbit bastamalardy ilgeriletýge beıildiligin atap ótip, Qazaqstan qaqtyǵystardy tek saıası-dıplomatııalyq jolmen sheshýge tabandy túrde shaqyratynyn málimdedi. Osy turǵyda Qazaqstan kelissózder ótkizý úshin alań usynýǵa daıyn ekenin taǵy da rastady.
Sonymen qatar mınıstr bıylǵy mamyr aıynda Túrkistan qalasynda ótetin TMU-nyń beıresmı sammıti uıymnyń rólin odan ári nyǵaıtýǵa jańa serpin berip, yntymaqtastyqty tereńdetýge jáne qatysýshy memleketterdiń kúsh-jigerin shoǵyrlandyrýǵa yqpal etetinin atap ótti.
Osy turǵyda suhbattasýshylar TMU-nyń ınstıtýtsıonaldyq damýynyń keleshek máselelerin de talqylady.
Forým aıasynda QR Syrtqy ister mınıstri Lıýksembýrg Premer-mınıstriniń orynbasary — Syrtqy ister jáne syrtqy saýda, sondaı-aq damý maqsatyndaǵy yntymaqtastyq jáne gýmanıtarlyq ister mınıstri Ksave Bettelmen, Bolıvııa SІM basshysy F. Aramaıo Karraskomen, Lıtva Respýblıkasynyń Syrtqy ister mınıstri Kıastýtıs Býdrıspen, Gvıneıa-Bısaý SІM basshysy Joaý Bernardý Vıeıramen jáne EO-nyń Adam quqyqtary jónindegi arnaıy ókili Kaısa Ollongrenmen ekijaqty kezdesýler ótkizdi.
Kezdesýler barysynda ekijaqty jáne kópjaqty yntymaqtastyqtyń ózekti máseleleri talqylandy.
Eske salsaq, osyǵan deıin Memleket basshysy Antalııa dıplomatııalyq forýmynyń ashylý rásimine qatysqanyn jazǵan edik.
Bul rette Halyqaralyq qatynastar jáne ekonomıkalyq saıasat sarapshysy Erik Batyrhanov Antalııa forýmyna qatysý tek ımıdjdik qadam emes, naqty ekonomıkalyq jáne saıası múmkindikterdi ilgeriletý quraly ekenin aıtty.