Túrki elderi birlesip ǵaryshqa ushyratyn «CubeSat» spýtnıgi qaı baǵytta zertteý júrgizbek

TAShKENT. KAZINFORM — Túrki memleketteri uıymyna múshe eldermen birlesip qolǵa alynǵan «CubeSat» spýtnıgin qurastyrýǵa ózbekstandyq mamandar da qatysady.

Bul haqynda Kazinform agenttiginiń menshikti tilshisine suhbat bergen «Ózbekǵarysh» agenttigi dırektorynyń orynbasary Mýhıddın Ibragımov málim etti.

— Qazirgi ýaqytta qazaqstandyq áriptesterimizben birge «CubeSat» spýtnıgin qurastyrý boıynsha jumys júrip jatyr. Bul joba Túrki memleketteri uıymy aıasynda qolǵa alynǵan. TMU-ǵa múshe elderdiń barlyǵy spýtnıkti qurastyrý ony ǵaryshqa shyǵarý isine qoldaý kórsetip otyr. Ózbek tarapy da bul jobaǵa qyzyǵýshylyq tanytady jáne qatysady. Bul — ǵylymı-tehnıkalyq jerserik bolmaq. Onda kamera jáne zertteý júrgizýge arnalǵan birneshe qurylǵy bolady. Negizgi mindet — spýtnıktiń ózin synap kórý, — dep jaýap qatty Mýhıddın Ibragımov Kazinform tilshisiniń saýalyna oraı.

Eske salaıyq, jyl basynda Mýhıddın Ibragımov Ózbekstan TMU-ǵa múshe eldermen birlesip ǵaryshǵa spýtnık ushyratynyn aıtyp edi.

Qosa ketsek, byltyr Ózbekstan ǵarysh keńistigin zertteýge baǵyttalǵan halyqaralyq shartqa qosylǵan edi.

Buǵan deıin habarlaǵanymyzdaı, Qazaqstan men Ózbekstan ǵarysh salasyndaǵy seriktestikti nyǵaıtýǵa nıetti.