Túrki elderi birlesip, dári-dármek satyp alý tetigin damytpaq

ASTANA. KAZINFORM – «SQ-Farmatsııa» Túrki memleketteri uıymyna múshe eldermen birlesip, dárilik zattardy toptasyp satyp alý tetigin damytý josparyn jarııalady.

Kompanııa málimetinshe, toptasyp satyp alý baǵa men logıstıkaǵa táýeldilikti azaıtyp, ekonomıkalyq turǵydan tıimdi qural retinde qarastyrylyp otyr.

– Bul tetik ulttyq satyp alý júıesin almastyrmaıdy. Ol tek áleýmettik mańyzy bar, tapshylyq qaýpi joǵary ári quny qymbat dárilik zattar boıynsha qoldanylady, – dedi «SQ-Farmatsııa» basqarma tóraǵasy Nurlybek Asylbekov.

Bastama otandyq farmatsevtıkalyq óndirýshilerdi qoldaýǵa da múmkindik beredi. Atap aıtqanda, ótkizý naryǵy keńeıip, uzaq merzimdi kelisimsharttar sany artady, óndiristi jergiliktendirýge serpin beriledi.

Qazirgi tańda Qyrǵyzstan jáne Ózbekstannyń salalyq uıymdarymen birlesken jumys toptary qurylyp, jol kartalary kelisilgen. Sonymen qatar tetikti kezeń-kezeńimen iske asyrý tásilderi bekitilgen.

– Qazir yntymaqtastyqtyń quqyqtyq jáne uıymdastyrýshylyq rásimderi pysyqtalyp jatyr. Sondaı-aq Ázerbaıjan Respýblıkasyna bastamaǵa qatysý jóninde resmı usynys joldandy, – dedi ol baıandamasynda.

Budan bólek, «SQ-Farmatsııa» biriktirilgen satyp alýlardy iske asyrý úshin Qazaqstan zańnamasyna ózgerister engizý boıynsha usynystar ázirlegen.

Aıta keteıik, 1439 baılanys ortalyǵy dári-dármekke qatysty 39 myńnan astam ótinish qabyldaǵany jaıly jazǵan edik.