Túrki elderi arasynda júk tasymalyn damytatyn birlesken komıtet qurylady
ASTANA. KAZINFORM — Senat «Túrki memleketteri uıymyna múshe memleketterdiń úkimetteri arasyndaǵy halyqaralyq quramdastyrylǵan júk tasymaly týraly kelisimdi ratıfıkatsııalaý týraly» zańdy maquldady.
Zań jobasy boıynsha baıandama jasaǵan senator Amangeldi Nuǵmanovtyń aıtýynsha, Túrki memleketteri uıymyna múshe memleketterdiń úkimetteri arasyndaǵy halyqaralyq quramdastyrylǵan júk tasymaly týraly kelisimge 2022 jyly 11 qarashada Ózbekstanda Túrki memleketteri uıymy Memleket basshylarynyń qatysýymen ótken 9-sammıt aıasynda qol qoıyldy.
Kelisim maqsaty — ártúrli kólik túrlerin paıdalana otyryp, halyqaralyq júk tasymaldaryn jeńildetý, sondaı-aq Túrki memleketteri uıymyna múshe memleketter arasyndaǵy tranzıttik jáne saýda-ekonomıkalyq yntymaqtastyqty damytý.
«2023 jyldyń qorytyndysy boıynsha Qazaqstan men Túrki memleketteri uıymyna múshe-memleketter arasyndaǵy júk tasymaldaý kólemi 35 mln tonnany qurady. Bul 2022 jylmen salystyrǵanda 20 paıyzǵa artyq. 2022 jyly 29 mln tonna bolǵan edi. Búgingi tańda kóptegen memleket úshin yntymaqtastyqtyń strategııalyq jobasy transkaspıılik halyqaralyq kólik baǵyty bolyp otyr. Qytaıdy, Ortalyq Azııany jáne Eýropany baılanystyratyn bul kólik arterııasy „Beldeý men joldyń“ kontınentaldy kópirine aınalady, júk tasymaldaý merzimin eki ese qysqartady jáne kólik shyǵyndaryn aıtarlyqtaı tómendetedi», — dedi ol.
Senatordyń aıtýynsha, osy kólik baǵytyn damytý maqsatynda temirjol, port ınfraqurylymyn jańǵyrtý jáne jyljymaly quram men saýda flotyn ulǵaıtý boıynsha jumystar júrgizilip jatyr.
Aqtaý portynda «konteınerlik hab» salynady. Bul joba tasymaldaý kólemin jylyna qosymsha 300 myń konteınerge deıin ulǵaıtýǵa múmkindik beredi.
«Qaralyp otyrǵan zań temir jol, sý jáne avtomobıl kóliginiń zamanaýı júıelerin damytýǵa, poıyzdardyń kedendik rásimderden ótýin jedeldetý úshin aldyn ala aqparat almasýdy qamtamasyz etýge, sondaı-aq júkterge qatysty tsıfrlyq tehnologııalardy engizýge yqpal etedi. Kelisimniń normalaryna sáıkes Túrki elderi arasyndaǵy tasymaldaýdy damytý jónindegi Birlesken komıtet qurylady. Kelisim Qazaqstan arqyly tranzıttik júk tasymaldaý kólemin odan ári arttyrý úshin alǵysharttar jasap, eldiń kólik-tranzıttik áleýetin damytýǵa oń áserin beredi.», — dedi Amangeldi Nuǵmanov.
