Túrik bıznesi Sırııaǵa oraldy
ASTANA.KAZINFORM — Bıylǵy jyldyń basynan beri Túrkııanyń Sırııaǵa eksporty 36,7 paıyzǵa ósti, dep habarlaıdy Kazinform agenttiginiń tilshisi.
Ońtústik-Shyǵys Anadoly Eksportshylar Odaǵynyń (GAİB) deregi Túrkııanyń Sırııaǵa eksportynyń 2025 jyldyń alǵashqy tórt aıynda 669,6 mıllıon dollar bolǵanyn kórsetedi. Jóneltý kólemi ótken jyldyń sáıkes kezeńimen salystyrǵanda 36,7 paıyzǵa artty. Mysaly, 2024 jyldyń qańtar-sáýir aılarynda eksport 490 mln dollardy qurady.
Ásirese, sáýir aıynda kúrt ósim baıqaldy. Sırııaǵa eksport kólemi osy aıda 162 mıllıon dollarǵa jetti, bul 2024 jyldyń sáýirinen 57,6%-ǵa ósti. Bul sekiris Túrkııanyń aımaq elderimen saýdasyndaǵy eń mańyzdy kórsetkishterdiń biri boldy.
Túrkııanyń Sırııaǵa eksportynyń artýy sanktsııa saıasatyndaǵy halyqaralyq ózgeristermen sáıkes keldi. Amerıka Qurama Shtattary Damaskke qarsy sanktsııalardy jeńildetýge daıyn ekenin jáne Eýropalyq Odaq olardy alyp tastaý protsesin bastaǵannan keıin túrik bıznesi arab memleketimen ekonomıkalyq baılanystardy nyǵaıtýdyń jańa múmkindikterin kórdi.
Túrik kompanııalary Sırııany qalpyna keltirýde mańyzdy ról atqarýǵa daıyn. Ári Sırııa naryǵy men Eýroodaq arasynda kópir bola alady. Bıznes ókilderiniń pikirinshe, Túrkııanyń geografııalyq ornalasýy jáne onyń Taıaý Shyǵys naryqtaryndaǵy tájirıbesi saýda ózara árekettesýdiń jańa kezeńinde oǵan strategııalyq artyqshylyq beredi.
Sarapshylar Sırııamen saýda-sattyqty qalpyna keltirý túrik eksporttaýshylaryn qoldap qana qoımaı, azyq-túlik, qurylys materıaldary, qural-jabdyqtar jáne basqa da qajetti taýarlardy jetkizý arqyly Sırııa ekonomıkasyn turaqtandyrýǵa kómektesetinin basa aıtady.
Buǵan deıin Túrkııanyń Sırııaǵa qatysty saıasatynyń úsh negizgi baǵytyn anyqtaǵanyn, onyń aımaqtaǵy aldaǵy áreketterin aıqyndaıtynyn jazǵanbyz.
Keıinirek Ankara men Damask aǵymdaǵy jyldyń basynan beri saýda-ekonomıkalyq yntymaqtastyqty aıtarlyqtaı nyǵaıtqany habarlandy.