Túrik avıakompanııalary shydamsyz jolaýshylarǵa aıyppul salady

ASTANA. KAZINFORM — Túrkııanyń ulttyq áýe tasymaldaýshylary ushaqqa otyrǵyzý kezinde jolaýshylardyń tártibin baqylaýdy kúsheıtetin qatań sharalardy engizip jatyr, dep jazady Kazinform agenttiginiń menshikti tilshisi.

Bul týraly eldiń Azamattyq avıatsııa bas basqarmasynyń (SHGM) resmı qujatyna silteme jasap, Akdeniz Gerek gazeti habarlady.

Jańa erejege sáıkes, ushaqta qarapaıym qaýipsizdik talaptaryn saqtamaǵan jolaýshylarǵa aıyppul salynady.

— Ushaq jerge qonǵan boıda oryndarynan turyp ketetin, júk sórelerin ashatyn nemese bortserikterdiń eskertýlerine qulaq aspaıtyn jolaýshylar qoldanystaǵy zań normalaryna sáıkes ákimshilik jazaǵa tartylýy múmkin, — delingen resmı habarlamada.

Buǵan deıin Qazaqstanda Aqtaý mańyndaǵy áýe apatynan keıin barlyq áýejaı men ushaqtardyń tehnıkalyq jaǵdaıy tekseriletini habarlanǵan edi.

Sonymen qatar jolaýshylardy tasymaldaý erejesin buzǵandarǵa aıyppul salynatyny týraly jazǵan edik.