Túrki áleminiń juldyzdary Ankarada óner kórsetti
ASTANA. KAZINFORM — Ankarada 500-ge jýyq ártistiń qatysýymen 10 myńǵa jýyq kórermen jınalǵan aýqymdy kontsert ótti. Keshke Dımash Qudaıbergen arnaıy qonaq retinde shaqyryldy, dep habarlaıdy Kazinform agenttiginiń Ankaradaǵy menshikti tilshisi.
Túrkııa astanasynda alǵash ret túrki áleminiń tanymal ónerpazdarynyń basyn qosqan aýqymdy kontsert ótti. Іs-shara Túrkııa Respýblıkasynyń kúnine jáne Túrki memleketteri uıymynyń (TMU) aldaǵy sammıtine oraı uıymdastyryldy. Sahnaǵa ár eldiń ókilderi shyǵyp, baýyrlas halyqtardyń mýzykalyq jáne mádenı murasyn pash etti.
Kontsertke 500-ge jýyq ónerpaz qatysyp, 10 myńǵa jýyq kórermen jınaldy. Baǵdarlamaǵa ulttyq mýzyka týyndylary, operalyq shyǵarmalar men dástúrli bıler endi. Ónerpazdardyń ónerin Túrkııa Prezıdentiniń sımfonııalyq orkestri súıemeldedi.
Keshtiń basty qonaǵy – Qazaqstannyń halyq ártisi Dımash Qudaıbergen boldy. Onyń ónerin tamashalaý úshin álemniń túkpir-túkpirinen jankúıerleri arnaıy kelgen. Kórermender ánshige qosyla án shyrqap, erekshe qoshemet bildirdi.
Túrkııa Prezıdenttik sımfonııalyq orkestriniń bas mýzykalyq jetekshisi ári dırıjeri Djemı Djan Delıorman Túrkııa men túrki álemi úshin mańyzdy oqıǵalar qarsańynda kontsert uıymdastyrýdyń ózi zor mártebe bolǵanyn atap ótti. Onyń aıtýynsha, mýzyka – halyqtardy jaqyndastyratyn kúsh, al túrki elderi ónerpazdarynyń shyǵarmalary orkestr repertýarynan oryn alǵan. Sondaı-aq ol Dımash Qudaıbergenniń kontsertke qatysýynyń aıryqsha mańyzyn atap, ánshini Qazaqstannyń ǵana emes, tutas túrki áleminiń maqtanyshy dep baǵalady.
Dımash Qudaıbergen mádenıet pen ónerdi dıplomatııanyń mańyzdy quraly dep sanaıdy. Onyń pikirinshe, birlesken shyǵarmashylyq jobalar elder arasyndaǵy dostyqty nyǵaıtyp, halyqtardyń ózara túsinistigin arttyrýǵa yqpal etedi. Ánshi túrik ónerpazdarymen bir sahnada óner kórsetip, qazaq mýzykasyn sheteldik tyńdarmanǵa tanytýǵa árdaıym mán beretinin jetkizdi.
Kontsertke Dımashtyń álemniń ár túkpirinen kelgen jankúıerleri qatysty. Reseılik tyńdarmandarynyń biri ánshige jáne onyń shyǵarmashylyǵyna arnalǵan óleńder jınaǵyn kópshilikke tanystyrdy. Ol Dımashtyń óner jolyn jeti jyldan beri baqylap kele jatqanyn jáne osy ýaqyt ishinde oǵan arnap kóptegen óleń jazǵanyn aıtty. Jınaq bıyl jazda jaryq kórip, búginde Máskeýdegi 17 kitaphananyń qoryna engen.
Qazaqstan atynan opera ánshileri Saltanat Dáýlethanova men Zarına Altynbaeva óner kórsetti. Zarına Altynbaeva túrkııalyq solıst Mýrat Karahanmen birge birneshe shyǵarma oryndady. Ánshi kontsertke qatysýdy úlken mártebe sanaıtynyn aıtyp, mundaı sharalar baýyrlas elder arasyndaǵy baılanysty nyǵaıtýǵa yqpal etetinin atap ótti.
Kontsert túrki halyqtarynyń ortaq mýzykalyq murasyn tanytyp, óner arqyly mádenı baılanysty nyǵaıtty.
Buǵan deıin «Voice of Turan» halyqaralyq baıqaýyna álemniń 20 elinen ónerpazdar qatysatyny habarlanǵan bolatyn.
