«Túrki áleminiń jastar astanasy – 2025» mártebesi aıasynda Almatyda 50-den astam is-shara ótti
ASTANA. KAZINFORM — Almatyǵa «Túrki áleminiń jastar astanasy – 2025» mártebesiniń berilýine baılanysty qalada túrli is-sharalar ótip jatyr. Jyl boıy júzege asyrylyp jatqan bastamalar Túrki memleketteri uıymyna múshe elderdiń jastary arasyndaǵy baılanys, ózara pikir almasý jáne mádenı yqpaldastyqty damytýǵa baǵyttalǵan. Bul týraly QR Mádenıet jáne aqparat mınıstrliginiń baspasóz qyzmeti málim etti.
Osy mártebe aıasynda Túrki memleketteri uıymynyń qoldaýymen Almatyda birqatar iri halyqaralyq is-sharalar ótti. Atap aıtqanda, III jastarǵa arnalǵan almasý baǵdarlamasy, jas kóshbasshylar men kásipkerler kezdesýleri, Turki Fest Almaty-2025 mádenı festıvali, «Jaıdarman» TURKI CUP-2025 halyqaralyq festıvali jáne ózge de mańyzdy is-sharalar uıymdastyryldy.
Qaladaǵy jastar komıýnıtı-ortalyqtarynyń jumysyna da erekshe mán berilip otyr. Bul ortalyqtarda jastardyń qatysýymen ártúrli formattaǵy is-sharalar ótkizilýde. Olardyń qatarynda bilim berý jáne mádenı bastamalar, pikir almasý alańdary, túrkitanýshylarmen kezdesýler, halyqaralyq dıalogtyq sessııalar, sondaı-aq tsıfrlyq daǵdylar men kreatıvti ındýstrııany damytýǵa arnalǵan sheberlik sabaqtary bar.
Jyl basynan beri komıýnıtı-ortalyqtarda 50-den astam is-shara ótkizilip, oǵan 3 myńnan astam jas qatysty.
«Túrki áleminiń jastar astanasy» jyly aıasynda jastar bastamalaryn qoldaýǵa, eriktiler qozǵalysyn damytýǵa jáne jastardy qoǵamdyq ári áleýmettik jobalarǵa tartýǵa basymdyq berilýde. Bul mártebe halyqaralyq baılanystardy keńeıtip, tájirıbe almasýǵa jol ashyp, túrki elderi jastary arasyndaǵy yntymaqtastyqtyń nyǵaıýyna yqpal etti.
Aldaǵy ýaqytta Digital Turkic Youth forýmy, Túrki memleketteri uıymynyń Jastar platformasynyń III Bas assambleıasy, V halyqaralyq jastar lageri, sondaı-aq uıymǵa múshe elder arasynda Stýdenttik ekologııalyq hab qurý sııaqty mańyzdy is-sharalardy ótkizý josparlanǵan.
Jyl sońynda «Túrki áleminiń jastar astanasy – 2025» jylynyń jabylý rásimi ótip, bul mártebe kelesi qalaǵa tabystalady.
Aıta keteıik, buǵan deıin «Túrkistan – túrki áleminiń rýhanı astanasy» atty derekti fılmder toptamasy Túrkııada kórsetildi.
