Túrki áleminiń jasandy ıntellekt etıkasyna arnalǵan alǵashqy jıyny ótti
ASTANA. KAZINFORM — Baký memlekettik ýnıversıtetinde jasandy ıntellekt etıkasyna arnalǵan túrki áleminiń alǵashqy halyqaralyq konferentsııasy ótti. Bul jıyn zamanaýı tehnologııalardyń qarqyndy damýynan týyndaǵan moraldyq jáne áleýmettik máselelerdi talqylaýǵa arnalǵan kópsalaly ǵylymı alańǵa aınaldy, dep habarlaıdy Halyqaralyq Túrki akademııasy.
Іs-sharaǵa Ázerbaıjan, Qazaqstan, Qyrǵyzstan, Túrkııa, Ózbekstan, Pákistan, Rýmynııa jáne Taılandtan kelgen ǵylymı jáne halyqaralyq uıymdardyń ókilderi qatysqan. Olar bilim berý, mádenıet jáne qoǵam ómirindegi jasandy ıntellektiniń rólin, bilim transformatsııasy, etıka, tsıfrlyq táýelsizdik jáne eńbektiń bolashaǵy sııaqty ózekti taqyryptardy qozǵady. Sonymen birge, tehnologııalardy jaýapty jáne etıkalyq turǵyda damytý úshin halyqaralyq yntymaqtastyqtyń mańyzdylyǵyna nazar aýdaryldy.
Óz sózinde Túrki akademııasynyń prezıdenti Shahın Mustafaev adamgershilik qundylyqtar men moraldyq ustanymdarǵa súıenbeı tehnologııalyq ilgerileý júzege aspaıtynyn atap ótti.
– Jasandy ıntellekt adamzatqa buryn-sońdy bolmaǵan múmkindikter ashyp qana qoımaı, jańa etıkalyq syn-qaterlerdi de týdyrady. Fılosofııalyq jáne gýmanıstik dástúri tereń túrki álemi ádil ári jaýapty tsıfrlyq dáýirdi qalyptastyrýǵa óz úlesin qosýy qajet jáne bilim men etıka árdaıym qatar órbýi tıis, – dedi ol.
Konferentsııada Baký memlekettik ýnıversıteti janynan qurylǵan, zamanaýı zertteýler júrgizýge jáne tehnıkalyq quzyretti gýmanıstik kózqaraspen ushtastyra biletin jańa býyn mamandaryn daıarlaýǵa baǵyttalǵan Jasandy ıntellekt etıkasyna arnalǵan jańa kafedra tanystyryldy.
Buǵan deıin Túrkııada Túrki dúnıesi arheologtary qaýymdastyǵynyń ekinshi otyrysy ótken edi.