Túrki áleminiń tarıhyn túgendegen qos tomdyq jaryq kórdi
ASTANA. KAZINFORM — Búgin «Túrkistan» entsıklopedııasy astanalyqtarǵa tanystyryldy. Qos tomdyq jańa basylym tutas túrki órkenıetiniń tarıhy men mádenı murasyn túgendeıdi. 880 betten turatyn eńbekti ázirleýge 300-den astam ǵalym men zertteýshi atsalysqan. Olar tórt myńnan astam ataý men uǵymdy qaıta zerdelep, burynǵy basylymdarda qamtylmaǵan tarıhı tulǵalar, mańyzdy oqıǵalar men jer-sý ataýlary týraly jańa maqalalar ázirlegen.
Ázirge kitaptyń ár tomy myń danamen qazaq tilinde basylyp shyqty. Aldaǵy ýaqytta baýyrlas elderdiń tilderine aýdarý josparlanyp otyr. Joba avtory Darhan Qydyráli bul eńbekti berisi Ortalyq Azııada, arysy túrki áleminde balamasy joq entsıklopedııa dep baǵalady.
— Memleket basshysy Qasym-Jomart Toqaev Túrki keńesiniń 2021 jylǵy 31 naýryzda ótken sammıtinde «Túrki órkenıetin jańǵyrtýdy, eń aldymen, ıAsaýı murasy men qasıetti Túrkistandy álemge tanytýdan bastaýǵa shaqyramyn» dep atap aıtqan edi. Bul sóz bizge baǵdar bolyp, 2021 jyly bastalǵan joba nátıjesinde 4 myńnan astam maqala qamtylǵan osy qos tomdyq entslıklopedııa jaryq kórdi. Qoldaý kórsetken Túrkistan oblysynyń basshylyǵyna rızashylyq bildiremiz, — dedi óz sózinde Darhan Qydyráli.
Buǵan deıin Túrkistannyń eki myń jyldyǵyna oraı bir tomdyq «Túrkistan» entsıklopedııasy jaryq kórgen edi. Sodan beri óńirde de, tutas túrki áleminde de eleýli ózgerister boldy. Sondyqtan joba avtorlary jańa basylymǵa Túrkistannyń túrki jurtynyń rýhanı ortalyǵyna aınalý jolyn, keıingi jyldardaǵy aýqymdy ózgerister men ǵylymı jańalyqtardy engizýge kúsh salǵan.
— Іrgeli eńbektiń bezendirilýine erekshe mán berildi. Basylymda tarıhı jáne geografııalyq kartalar, tarıhı tulǵalardyń portretteri, mınıatıýralar, jańǵyrtpa syzbalar, arheologııalyq jáne sáýlet eskertkishteriniń sýretteri, sondaı-aq arnaıy túsirilgen túrli-tústi fotosýretter paıdalanyldy, — dedi dedi joba jetekshisi akademık, qoǵam jáne memleket qaıratkeri Darhan Qydyráli.
Eki tomdyq eńbektiń tusaýkeseri dóńgelek ústel formatynda ótti. Jıynǵa túrki elderiniń elshileri, ǵalymdar men zertteýshiler qatysty. Olar ortaq tarıhı murany zerdeleý men túrki halyqtarynyń rýhanı baılanysyn nyǵaıtýdyń mańyzyn atap ótti.
— Búginde elderimiz — Qazaqstan men Ázerbaıjan arasyndaǵy dostyq pen baýyrlastyq qarym-qatynastar prezıdentterimizdiń berik saıası erik-jigeriniń arqasynda odan ári nyǵaıyp keledi. Sonymen qatar eki el de túrki áleminiń yqpaldastyǵy men birligine eleýli úles qosyp otyr. Búgin tanystyrylyp otyrǵan «Túrkistan» entsıklopedııasy da — osyndaı qoldaý men qamqorlyqtyń nátıjesi, — dedi Ázerbaıjandaǵy «Túrkistan» gazetiniń bas redaktory Agıl Djamal.
Aıta keteıik, is-shara barysynda QR Prezıdentiniń keńesshisi Málik Nurjanuly Otarbaev Memleket basshysynyń atynan entsıklopedııany ázirleýge atsalysqan Turdyqul Shańbaı men basylymnyń jaýapty redaktory Jandos Bádelulyna «Barys» arnaıy belgisin jáne Alǵys hat tabystady.
Aıta keteıik, búgin Respýblıka kúni qarsańynda «Kitap oqıtyn ult» jobasynyń ánurany tanystyryldy.
