Túrki áleminiń medıa basshylary Ankarada bas qosady
ASTANA. KAZINFORM — Túrki memleketteri uıymyna (TMU) múshe elder buqaralyq aqparat quraldarynyń basshylary Ankara forýmynda bas qosady. Bul týraly Astanada ótken TMU-ǵa múshe elderdiń aqparat salasyna jaýapty mınıstrleri men joǵary laýazymdy tulǵalarynyń 8-shi otyrysynda Túrkııa Respýblıkasy Prezıdenti Ákimshiligi Kommýnıkatsııalar basqarmasy basshysynyń orynbasary Ferhat Pırınchchı aıtty.
Aıta keteıik, otyrysqa QR Mádenıet jáne aqparat birinshi vıtse-mınıstri Qanat Ysqaqov, TMU Bas hatshysynyń orynbasary Ómer Kojaman, Ózbekstan Respýblıkasy Prezıdenti Ákimshiligi janyndaǵy Medıakontentti daıyndaý ortalyǵynyń dırektory Kobýljon Ahmedov, Túrkııa Respýblıkasy Prezıdenti Ákimshiligi Kommýnıkatsııalar basqarmasy basshysynyń orynbasary Ferhat Pırınchchı, Qyrǵyz Respýblıkasynyń Mádenıet, aqparat jáne jastar saıasaty mınıstriniń orynbasary Salkyn Sarnogoeva jáne Ázerbaıjan Respýblıkasynyń BAQ jáne habar taratý keńesi Halyqaralyq qatynastar departamentiniń basshysy Rasım Bagırov qatysty.
QR Mádenıet jáne aqparat birinshi vıtse-mınıstri Qanat Ysqaqov atap ótkendeı, búginde tsıfrlyq tehnologııalar men jasandy ıntellektiniń qarqyndy damýy medıa salasyn, aqparat taratý tásilderin jáne aýdıtorııamen baılanys ornatý joldaryn túbegeıli ózgertýde. Jalǵan aqparattyń taralýy shynaıy aqparat kózderine degen senimdi de tómendetip otyr.
Qatysýshylar dıpfeıkti anyqtaý, aqparattyń shynaıylyǵyn jedel tekserý, ulttyq aqparat agenttikteriniń baılanysyn nyǵaıtý, sondaı-aq jýrnalısterdiń jańa tehnologııalardy qoldaný daǵdylaryn jetildirý máselelerin talqylady.
Jıynnyń mańyzdy taqyryptarynyń biri túrki memleketteri arasynda ortaq aqparattyq keńistikti qalyptastyrý jumystary boldy.
Túrkııa Respýblıkasy Prezıdenti Ákimshiligi Kommýnıkatsııalar basqarmasy basshysynyń orynbasary Ferhat Pırınchchı kontent almasý, birlesken jobalar ázirleý, oqytý jáne tájirıbe bólisýdi qamtıtyn Túrki habar taratý jelisi (Türk Yayın Ağı) bastamasynyń talqylanýyn qoldaıtynyn atap ótti.
Aıtýynsha, atalǵan jeli aıasynda qurylýy josparlanǵan komıtetter habar taratý salasyndaǵy birlesken jobalardy damytýǵa yqpal ete alady.
Otyrys barysynda TMU keńistiginde televızııalyq jáne radıobaǵdarlamalardy ózara translıatsııalaý týraly Ózbekstan usynysy da tilge tıek etildi.
F.Pırınchchı atalǵan usynys jobasynyń talqylanýynda Túrkııa óz ustanymyn jetkizgenin aıta kele, Túrkııanyń bastamasymen qolǵa alynǵan Túrki memleketteriniń habar taratý salasyn retteýshi organdary forýmyn (T-BRAF) qurý jumystary da sońǵy kezeńge jetip qalǵanyn málimdedi. Ol sońǵy protsedýralar TMU-nyń XIII sammıti aıasynda aıaqtalatynyna úmit bildirdi.
Budan bólek, Túrkııa Prezıdenti Ákimshiligi Kommýnıkatsııalar basqarmasy basshysynyń orynbasary TMU-nyń XIII resmı sammıti aıasynda 30–31 qazan kúnderi medıa salasynyń ókilderi men BAQ uıymdarynyń basshylary Ankara qalasynda bas qosatynyn málim etti.
«Túrki áleminiń dıalogtary» atty forýmda strategııalyq kommýnıkatsııa, qoǵamdyq dıplomatııa, dezınformatsııaǵa qarsy kúres, sondaı-aq túrki áleminiń ortaq tarıhy, mádenıeti men órkenıettik murasy talqylanady dep josparlanǵan. Al bul forýmǵa daıyndyq sheńberinde keıingi aılarda Astana, Baký, Tashkent, Bishkek jáne Lefkosha qalalarynda «Túrki áleminiń dıalogtary: Ortaq bolashaq, ortaq kózqaras» taqyrybynda paneldik kezdesýler serııasy uımdastyrylǵan.
TMU-ǵa múshe elderdiń aqparat salasyna jaýapty mınıstrleri men joǵary laýazymdy tulǵalarynyń 8-shi otyrysynyń qorytyndysy boıynsha ortaq kommıýnıkege qol qoıyldy. Kelesi, 9-shy otyrys Qyrǵyzstan astanasy Bishkekte ótetini aıqyndaldy.
Aıta keteıik, buǵan deıin Túrki memleketteriniń ortaq kartasy jasalatynyn jazdyq.
