Túrki áleminiń mádenı astanasy: Aqtaýda 25 myń adam jınalatyn ǵalamat shoý ótedi
ASTANA. KAZINFORM – Erteń Aqtaýda Kaspıı teńiziniń jaǵalaýynda «Aqtaý — Túrki áleminiń astanasy» jylynyń ashylý saltanaty ótedi. Jibek Joly telearnasynyń tilshisi Gúljazıra Matenova Aqtaýdan tikeleı kórsetilimge shyǵyp, daıyndyq jumystary qalaı júrip jatqanyn aıtyp berdi.
Ashylý saltanaty TÚRKSOI Halyqaralyq uıymy, QR Mádenıet jáne aqparat mınıstrligi, Mańǵystaý oblysynyń ákimdigi jáne Aqtaý qalasynyń ákimdiginiń qoldaýymen uıymdastyrylǵan.
− Kesheli beri Aqtaýda jańbyr, teńiz jaǵasy bolǵandyqtan jel, azdaǵan tuman, yzǵar da bar. Biraq qala ákimi jańbyr sharanyń shyrqyn buza almaıdy deıdi. Óıtkeni Naýryz merekesinde dál osy alańda 12 myń kórermen osy jerde tapjylmaı kontsert tamashalaǵan eken. Al erteń odan eki ese kóp adam jınalady dep boljanyp otyr. Kúrdeli konstrýktsııalardan, LED-ekrandardan erteń osy jerde ǵalamat shoý bolatyny baıqalady. Uıymdastyrýshylar kóne mura men jańa tsıfrlyq múmkindikterdi ushtastyramyz dep ýáde berip otyr, - dedi jýrnalıst «Bugin Live» baǵdarlamasynda.
Uıymdastyrýshylar kontsert hedlaınerlerin ázirge qupııa ustap otyr. Degenmen, bizge belgili bolǵandaı, gala-kontsertke tanymal ánshi Dımash Qudaıbergen, «Kalifarniya», Mırbek Atabekovtiń hedlaıner retinde óner kórsetedi dep josparlanǵan. Sondaı-aq baǵdarlamada ázerbaıjandyq ánshi Roza Zergerlı men áıgili «ıAlla» toby da bar.
Aıta keteıik, osymen Qazaqstannyń úshinshi qalasy «Túrki áleminiń mádenı astanasy» mártebesin alyp otyr. 2012 jyly Túrki áleminiń tájin kıgen alǵashqy qala – Astana edi, odan keıin tizimdi Túrkııanyń Eskishahary, Reseıdiń Qazan qalasy, Túrikmenstannyń Mary, Ázerbaıjannyń Shekı qalalary jalǵastyrdy.
Al 2017 jyly mádenı sherý bizdiń Túrkistan qalasynda ótti, keıinirek Túrkııanyń Kastamoný, Býrsa, Qyrǵyzstannyń Osh, Ózbekstannyń Hıýa, Ázerbaıjannyń Shýsha, Túrikmenstannyń Áneý qalalary mádenı astana boldy.
Aıta keteıik, «Aqtaý – Túrki áleminiń mádenı astanasy» jobasynyń is-sharalary 5 sáýirde bastalyp, kúzge deıin jalǵasady. 7-9 sáýir kúnderi «Túrki yrǵaǵynda bı» halyqaralyq bı baıqaýy, 29-mamyrda «Túrki halyqtarynyń órkenıeti jáne onyń álemdik mádenıet tarıhyndaǵy orny» atty halyqaralyq ǵylymı-praktıkalyq konferentsııa ótedi dep josparlanǵan.
Odan keıin «Túrki áleminiń totemi» halyqaralyq konferentsııasy, «Qyrymnyń qyryq batyry» jyryna arnalǵan túrki epostarynyń sherý-festıvali, «Kaspıı – dostyq teńizi» vokaldy-ınstrýmentaldy ansamblderi festıvali men Túrki elderiniń folklorlyq ansamblderi jáne aspapta oryndaýshylarynyń festıvali bolady.
Al 15 maýsymda Nurǵısa Tilendıevtiń 100 jyldyǵyna arnalǵan «Mańǵystaý maqamdary» Túrki álemi sazgerleriniń festıvali ótedi. XXVI «TÚRKSOI opera kúnderi» túrki elderiniń opera juldyzdarynyń festıvali, «MODEL CUP» modelder baıqaýy, «Dalamen úndes – baba óner» Túrki álemi qolóner sheberleriniń festıvali jáne VIII «Túrki álemi etno-moda sán kórsetilimi» josparlanǵan.
Sonymen birge, «AQ MAıA FEST» shubat festıvali, «Jumbaq boıaýlar» halyqaralyq sýretshiler men músinshiler sımpozıýmy jáne XXV «TÚRKSOI sýretshileriniń májilisi», Abaı Qunanbaıulynyń 180 jyldyǵy aıasynda jas aqyndar arasyndaǵy «Túrki shaıyrlary» І halyqaralyq poezııa festıvali bolady. «Ónerli óren» halyqaralyq balalar shyǵarmashylyǵy festıvali, «Meıirimdi túrki álemi» Halyqaralyq múmkindigi shekteýli balalardyń óner festıvali sııaqty balalarǵa arnalǵan is-sharalar, foto sýretshiler festıvali, kıno jáne teatr festıvalderi ótedi.
Al 13-14 qarasha kúnderi XXXXII «TÚRKSOI Halyqaralyq uıymyna múshe elderi mádenıet mınıstrleriniń turaqty keńesiniń otyrysy» men «Aqtaý – Túrki áleminiń mádenı astanasy - 2025» sharasynyń jabylý saltanaty josparlanǵan.