Túrki áleminiń damý baǵdaryn iske asyrýǵa basa mán berýimiz qajet – Prezıdent
ASTANA. KAZINFORM – Prezıdent ekonomıkalyq yntymaqtastyqty turaqtylyq pen ósip-órkendeýdiń túp negizi retinde atady. Bul týraly Aqordanyń baspasóz qyzmeti habarlady.
– Biz 2040 jylǵa deıingi Túrki áleminiń damý baǵdaryn tolyq iske asyrýǵa basa mán berýimiz qajet. Búgingi sammıt osy jospardy naqty sharalarmen tolyqtyrýǵa tıis. Uıymǵa qatysýshy ár memlekettiń ózine tán artyqshylyǵy jáne jetistigi bar. Soǵan qaramastan Uıym aıasynda saýda-ekonomıka salasyndaǵy iri jobalardy júzege asyrý úshin naqty tetikter usynylǵan. Sonyń biri – Túrki ınvestıtsııalyq qory. Osy qarjy uıymynyń múmkindikterin barynsha paıdalanýymyz kerek. Bıyl Túrkistanda elderimizdiń ekonomıka jáne saýda mınıstrleri bas qosady. Sol kezde Qor qarjylandyratyn jobalar tizimin jasaǵan jón bolar edi. Ónerkásip salasyndaǵy yqpaldastyq elderimizdiń ekonomıkasyn ártaraptandyrý isinde mańyzdy ról atqarady. Osy oraıda, Túrki saýda-ónerkásip palatasynyń áleýeti zor dep esepteımiz. Kelesi jyly osy palataǵa Qazaqstan tóraǵa bolady. Bul baǵytta biz naqty jobalarǵa basymdyq beretin Ónerkásiptik kooperatsııa baǵdarlamasyn qabyldaýdy usynatyn bolamyz, – dedi Qasym-Jomart Toqaev.
Prezıdent kólik-logıstıka salasyndaǵy áriptestikti jańa deńgeıge kóterýdi basty mindettiń biri sanaıdy.
– Elderimiz Shyǵys pen Batysty, Ońtústik pen Soltústikti jalǵaıtyn toǵyz joldyń toraby – Eýrazııa tórinde ornalasqan. Qazir Qazaqstan aýmaǵy arqyly 5 halyqaralyq temirjol dálizi ótedi. Jaqynda biz «Dostyq – Moıynty» temirjolynyń ekinshi jelisin iske qostyq. Bul qadam TransQazaqstan temirjol dálizin qarqyndy damytýǵa yqpal etedi. Jańa jol júk tasymalynyń kólemin 5 ese arttyrýǵa múmkindik beredi. Budan basqa taǵy da eki mańyzdy temirjol salynyp jatyr. Osy jobalar aımaqtyq logıstıkany ártaraptandyrý isine tyń serpin beretini anyq. Transkaspıı halyqaralyq kólik baǵdary Eýrazııadaǵy jol torabynyń strategııalyq bóligine aınaldy. Sońǵy 5 jylda Orta dáliz arqyly tasymaldanatyn júk kólemi 6 ese ósti. Jaqynda Uıymǵa múshe memleketterdiń kólik mınıstrleri Almatyda bas qosty. Taraptar kezdesýde osy jol baǵdaryna qatysty birqatar kelisimge qol jetkizdi. Bul rette biz túrki memleketterin Orta dáliz boıyndaǵy áýe habtary, temirjol beketteri jáne teńiz porttary ınfraqurylymyn jańǵyrtýǵa belsene atsalysýǵa shaqyramyz. Qazir kólik-tranzıt salasyn tsıfrlandyrýǵa qatysty jumys qarqyndy júrip jatyr. Osy oraıda Jasandy ıntellekt tehnologııasyn paıdalaný tıimdi bolatyny sózsiz. Sondyqtan bedeldi sarapshylardy tarta otyryp, Uıym aıasynda arnaıy Tsıfrlyq monıtorıng ortalyǵyn qurý máselesin talqylaýdy usynamyz, – dedi Memleket basshysy.
Eske sala keteıik, buǵan deıin Prezıdent Túrki memleketteri uıymynyń HІІ sammıtinde sóz sóılegenin jazǵan edik.