Túrki áleminiń birligin nyǵaıtý asa mańyzdy — Memleket basshysy
ASTANA.KAZINFORM — Túrki memleketteri uıymy geosaıası joba nemese áskerı uıym emes. Ol — baýyrlas elderdiń saýda-ekonomıkalyq, joǵary tehnologııalyq, tsıfrlyq jáne mádenı-gýmanıtarlyq yntymaqtastyǵyn nyǵaıtatyn mańyzdy alań. Bul jóninde Qasym-Jomart Toqaev Túrki memleketteri uıymynyń Túrkistanda ótip jatqan beıresmı sammıtinde málimdedi.
Onyń sózinshe, Qazaqstan Túrki memleketteri uıymyn jan-jaqty damytýǵa múddeli.
— Búginde bizdiń uıymǵa halyqaralyq qaýymdastyq senim bildirip otyr. Abyroı-bedelimiz de artyp keledi. Osy oraıda, Qazaqstan Reseıdiń «Altaı — túrki órkenıetiniń besigi» jobasyna oń kózqarasyn bildirdi. Buǵan qosa, biz «Altaı — suhbat alańy», ıaǵnı dıalogy forýmyn qurý jónindegi usynysymyzdy jarııaladyq, — dedi Qasym-Jomart Toqaev.
Sonymen birge, Qazaqstan Túrkııanyń «Túrki memleketteri uıymy +» formatyn qurý bastamasyn da quptaıdy.
— Elimiz Túrkııanyń yntymaqtastyq aıasyn keńeıtýge baǵyttalǵan «Túrki memleketteri uıymy +» formatyn qurý bastamasyn qoldady. Osy formatqa qosylýǵa nıet bildirgen memleketter men uıymdarǵa qatysty naqty ólshemder bolýy qajet dep sanaımyn. Eń bastysy, jańa formattyń jumysy uıymnyń maqsattary men mindetterine saı kelip, keri áserin tıgizbeýi kerek. Mysaly, sońǵy ýaqytta Túrki memleketteri uıymyn áskerı uıym retinde sıpattaıtyn pikirler aıtylyp júr. Olardyń teris peıili bizge anyq. Maqsattary eldestirý emes ekeni de belgili. Qazaqstan ondaı ustanymdy joqqa shyǵarýy kerek dep sanaımyn. Biz úshin túrki áleminiń birligin nyǵaıtý asa mańyzdy, kezek kúttirmeıtin basymdyq. Túrki memleketteri uıymy geosaıası joba emes, áskerı uıym da emes. Bul — baýyrlas elderdiń saýda-ekonomıkalyq, joǵary tehnologııalyq, tsıfrlyq jáne mádenı-gýmanıtarlyq yntymaqtastyǵyn nyǵaıtatyn mańyzdy alań. Mundaı ustanym — elimiz úshin mańyzdy basymdyq. Sebebi, bul ulttyq múdde turǵysynan da tıimdi ekenin anyq, — dedi Memleket basshysy.
Onyń málimdeýinshe, túrki álemi árdaıym yntymaq-birlikten aırylmaýy kerek.
— «Altaý ala bolsa, aýyzdaǵy ketedi, tórteý túgel bolsa, tóbedegi keledi» degen ataly sóz bárimizge ortaq. Túrki álemi árdaıym tatý bolyp, alǵa qoıǵan maqsatynan aýytqymaı, birlese damı berý kerek. Sondyqtan búgingi basqosý tamyry bir, tarıhy ortaq elderimizdiń aýyzbirshiligin arttyra túseri sózsiz, — dedi Prezıdent.
Aıta keteıik, buǵan deıin Memleket basshysynyń túrki tilderine ortaq termınologııalyq negiz qalyptastyrý jónindegi málimdemesin jarııalaǵanbyz.
