Túrki Akademııasynyń VIII jazǵy mektebi bastaldy
ASTANA. KAZINFORM — Túrkııanyń Konıa provıntsııasyndaǵy Seljúk ýnıversıtetinde túrki álemi elderi men basqa da memleketterden kelgen jas zertteýshilerdiń basyn qosqan Túrki Akademııasynyń VIII dástúrli jazǵy mektebi bastaldy. Bir aptaǵa josparlanǵan ǵylymı sharaǵa túrki elderi men ózge memleketterden kelgen 30-dan astam jas zertteýshi qatysyp jatyr.
Jazǵy mektepti Túrki akademııasy, Túrkııa ǵylym akademııasy (TÜBA) jáne Seljúk ýnıversıteti birlesip uıymdastyrǵan. Baǵdarlama aıasynda Túrki akademııasymen kóp jyldan beri ǵylymı baılanys ornatqan túrki álemi elderiniń jetekshi ǵalymdary men sarapshylary dáris oqıdy. Mamandar bir apta boıy jas zertteýshilerge óz tájirıbesimen bólisip, ǵylymı izdenisterine baǵyt-baǵdar beredi.
Bıylǵy jazǵy mektepke Ázerbaıjan, Qazaqstan, Qyrǵyzstan, Túrkııa, Ózbekstan, Albanııa, Bosnııa jáne Gertsegovına, Grýzııa, Mońǵolııa, Reseı, Soltústik Makedonııa jáne Tatarstannan 30-dan astam jas zertteýshi jınaldy. Olar bir apta boıy dárister men pikirtalastarǵa, sondaı-aq basqa da akademııalyq is-sharalarǵa qatysyp, kásibı bilimin jetildiredi jáne halyqaralyq ǵylymı baılanystaryn nyǵaıtady.
– Bul jazǵy mekteptiń mańyzdylyǵy ártúrli elderden kelgen jas zertteýshilerdi bir ortaǵa jınap, bilim men tájirıbe almasýǵa múmkindik berýinde. Munda qalyptasatyn ǵylymı baılanystar bolashaqta birlesken zertteýler men túrki álemi aýqymyndaǵy iri ǵylymı jobalarǵa ulasatynyna senimdimiz, — dedi Seljúk ýnıversıtetiniń prorektory Zekı Baıramoglý.
VIII jazǵy mekteptiń baǵdarlamasy túrki áleminiń tarıhy men mádenı geografııasyn, túrki tilderi men ádebıetin, órkenıettik murasyn, óner tarıhy men sáýletin, sondaı-aq dástúrli óner túrlerin qamtıdy.
Aıta keteıik, Túrki áleminiń arheologtary ortaq tsıfrlyq baza qurýǵa kelisti.
Sondaı-aq, Túrki memleketteri uıymynyń alǵashqy birlesken spýtnıgi 2027 jyly ushyrylady.
