Túrki Akademııasynyń qurylǵanyna 15 jyl toldy
ASTANA. KAZINFORM – Búgin Túrki Akademııasynyń qurylǵanyna 15 jyl toldy. Osy kezge deıin Túrki Akademııasy ondaǵan ǵylymı jobany júzege asyryp, júzdegen ǵylymı eńbekti jaryqqa shyǵardy jáne Túrki dúnıesindegi ǵylymı yntymaqtastyqtyń mańyzdy alańyna aınaldy.
2009 jylǵy 3 qazanda Nahchyvanda ótken Túrki memleketteri basshylarynyń sammıtinde Qazaqstan túrki álemin jan-jaqty zertteýmen aınalysatyn ortaq ǵylymı mekeme qurýdy usynǵan edi. Osy usynys negizinde 2010 jyly 25 mamyrda Astanada Túrki Akademııasy quryldy.
Al 2012 jyly 23 tamyzda Bishkekte ótken Túrki memleketteri uıymynyń ekinshi sammıtinde «Túrki akademııasyn qurý týraly kelisimge» qol qoıyldy. Ázerbaıjan, Qazaqstan, Qyrǵyzstan jáne Túrkııa parlamentteriniń «Túrki Akademııasyn qurý týraly kelisimdi» ratıfıkatsııalaý protsesi 2021 jyly aıaqtaldy.
2022 jyldan bastap, Túrki Akademııasy múshe memleketterden mindetti jarnalar men mamandardy qabyldap, tolyqqandy halyqaralyq uıym retinde jumys isteı bastady. Túrki Akademııasy 2018 jáne 2022 jyldary Majarstan men Ózbekstanǵa baqylaýshy el mártebesin berdi.
Túrki Akademııasy – Túrki memleketteri uıymy (TMU) aıasynda qurylǵan, túrki elderi arasyndaǵy ǵylym men bilim salasyndaǵy yntymaqtastyqty úılestiretin jáne yntalandyratyn biregeı halyqaralyq uıym. Akademııa túrkitanýdyń túrli salalarynda, sonyń ishinde tarıh, arheologııa, etnologııa, antropologııa, ádebıet, til bilimi, termınologııa, óner jáne áleýmettik-ekonomıkalyq máseleler boıynsha yntymaqtastyqty damytady.
Túrki Akademııasynyń tórt múshe memleketi jáne eki baqylaýshy eli bar. Akademııanyń shtab-páteri Qazaqstannyń bas qalasy Astanada ornalasqan.
Túrki Akademııasynyń prezıdenti laýazymyn 2010-2014 jyldary aralyǵynda professor, fılologııa ǵylymdarynyń doktory Shákir Ybraev, al 2014-2022 jyldary aralyǵynda professor, tarıh ǵylymdarynyń doktory Darhan Qydyráli atqarǵan. 2022 jyldan beri akademııany tarıh ǵylymdarynyń doktory, Ázerbaıjan Ulttyq Ǵylym akademııasynyń akademıgi, Halyqaralyq Ortalyq Azııa zertteý ortalyǵynyń korrespondent múshesi Shahın Mustafaev basqarady.
Buǵan deıin Túrki memleketteri uıymynyń Majarstandaǵy beıresmı sammıti qalaı ótkeni habarlanǵan edi.