Týrızmniń damýyna keıbir «eko-belsendiler» zııan keltirip otyr - Prezıdent
ASTANA. KAZINFORM – Týrızmniń damýyna tumsa tabıǵatty qorǵaý degen jeleýmen kez kelgen jobaǵa qarsy naýqan uıymdastyratyn keıbir «eko-belsendiler» zııan keltirip otyr. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.
– Mundaı kúmánniń týyndaýy zańdy. Men Úkimetke eskertý jasaǵannan keıin týrızmdi damytý jumystary jandana tústi. Alaıda, aldymyzda uzaq ta kúrdeli jol tur. Bul – ekonomıka, mádenıet, qaýipsizdik jáne bıznes – barlyǵy bir jerge toǵysatyn kúrdeli sala. Munda óz jumysyna jan-tánimen berilgen kásibı mamandar, eń bastysy, naǵyz otanshyl azamattar jumys isteýi kerek. Týrızm salasynda jalqaýlyq pen nemquraılylyqqa, ashkózdik pen dórekilikke jol joq, - dedi Prezıdent.
Memleket basshysynyń aıtýynsha, byltyr Qazaqstanǵa mıllıondaǵan shetel azamaty keldi. Іshki týrızm qarqyndy damı bastady. Munyń bári – óte jaqsy úrdis.
- Álem elderi týrısterdi tartý úshin jeke ınvestorlarǵa qolaıly jaǵdaı jasap otyr. Bizdiń elde kórikti jerler óte kóp. Qazir ekotýrızmge degen suranys joǵary. Osy turǵydan alǵanda, Qazaqstanǵa teń keletin el joq sekildi kórinedi. Alaıda belgili bir sebepterge baılanysty, sonyń ishinde jaýapty tulǵalardyń biliksizdigi men nemquraılyǵynyń kesirinen týrızmniń bolashaǵy zor osy bir salasy áli kúnge deıin kenje qalyp otyr. Ázirge tanystyrý, ıaǵnı prezentatsııa jumystarynan ári asa almaı jatyrmyz, - dedi Qasym-Jomart Toqaev.
Prezıdenttiń atap ótýinshe, týrızmniń damýyna tumsa tabıǵatty qorǵaý degen jeleýmen kez kelgen jobaǵa qarsy naýqan uıymdastyratyn keıbir «eko-belsendiler» zııan keltirip otyr. Kópshiliginiń tabıǵatta sharýasy da joq. Olar óziniń tanymaldyǵyn arttyrý úshin qoǵamdy dúrliktirýdi, qazirgi tilmen aıtqanda, «haıp» jasaýdy ǵana kózdeıdi. Týrızm bıznesinde ábden ákki bolǵan, básekelesterdiń shyqqanyn qalamaıtyn kásipkerler keıde olardyń qoltyǵyna sý búrkip otyrady.
- Taý shańǵysy týrızmine qatysty jaǵdaı da osyǵan uqsas. «Shymbulaq» Almaty qalasynyń ortalyǵynan nebári jarty saǵattyq jerdegi erekshe tabıǵattyń ortasynda tur. Álemde oǵan teń keletin demalys orny kemde-kem. Alaıda kópten beri eshteńe jasalmaǵan kýrorttyń syny da, syry da ketip, tozyp barady. Tabıǵattyń tamasha tartýy sanalatyn osy kórikti mekendi damytý úshin tyń tásilder qajet. Qazir elimizdegi tájirıbeli developerlik kompanııa iske kiristi. Biraq Úkimet pen ákimdiktiń qoldaýyna qaramastan, jumys barysy daıyndyq jáne tanystyrý sharalarynan asa qoıǵan joq. Al kórshi elderde taý shańǵysy ınfraqurylymy qarqyndy salynyp jatyr, - dedi Prezıdent.
Qasym-Jomart Toqaev Almaty taý klasteriniń áleýeti óte zor ekenin basa aıtty.
- Bul salada aýqatty adamdarǵa da, ortasha tabysy bar azamattarǵa da birdeı qyzmet kórsetilýge tıis. Sondyqtan ondaǵy týrıstik ınfraqurylymdy ártaraptandyrý máselesine nazar aýdarý qajet. Týrızm salasyndaǵy kadr tapshylyǵy – óte ózekti másele. Sondyqtan Túrkistanda Halyqaralyq týrızm jáne meımandostyq ýnıversıteti ashyldy. 2024 jyly oqý ordasynyń alǵashqy túlekteri dıplomdaryn alyp, eńbek naryǵyna qosyldy. Alaıda bul jetkiliksiz, - dedi Memleket basshysy.
Prezıdent kadr máselesin sheshý úshin qosymsha sharalar qabyldanatynyn basa aıtty.
- Degenmen salymyz sýǵa ketip, eńsemizdi túsirip otyrýǵa da bolmaıdy. Álemdik deńgeıdegi tabloıdtar saıahatshylarǵa Qazaqstanda demalýdy usynyp jatsa, eki ese qarqynmen jumys isteýimiz kerek. «CNN Travel» 2025 jyly Almatyny Ortalyq Azııadaǵy «sáni men saltanaty jarasqan jańa astana» dep atady. Almaty ákimine shahardy kúndiz-túni qonaǵy úzilmeıtin Nıý-Iork, Máskeý, Parıj sııaqty «eshqashan kóz ilmeıtin qalaǵa» aınaldyrý tapsyryldy. Qalada ınfraqurylymdy jaqsartý, abattandyrý, jaryqtandyrý baǵytynda áli de kóp jumys istelýi kerek, - dedi Qasym-Jomart Toqaev.
Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.