Týrızmge tartylǵan ınvestıtsııa kólemi boıynsha Astana kósh bastap tur
ASTANA. KAZINFORM — 2026 jyldyń alǵashqy bes aıynda Astananyń týrızm salasyna 250 mlrd teńge ınvestıtsııa tartyldy. Bul ótken jyldyń osy kezeńimen salystyrǵanda eki ese kóp.
Bul týraly Astana qalasynyń Investıtsııalar jáne kásipkerlikti damytý basqarmasy basshysynyń orynbasary Maqsat Jańabaev qalalyq kommýnıkatsııalar qyzmetinde ótken brıfıngte málim etti.
— 2025 jyldyń qorytyndysy boıynsha Astana qalasynyń týrızm salasyndaǵy negizgi kapıtalǵa salynǵan ınvestıtsııalar kólemi 438,3 mlrd teńgeni qurady. Bul kórsetkish boıynsha elorda respýblıkada birinshi orynǵa shyqty. Al bıylǵy qańtar-mamyr aılarynda týrızm salasyna 250 mlrd teńge ınvestıtsııa tartyldy. Bul ótken jyldyń sáıkes kezeńimen salystyrǵanda eki ese kóp, — dedi Maqsat Jańabaev.
Spıkerdiń aıtýynsha, sońǵy birneshe jylda týrızmge quıylǵan ınvestıtsııa kólemi turaqty túrde ósip keledi. Máselen, 2024 jyly bul kórsetkish 272,7 mlrd teńgeni, 2023 jyly — 201,4 mlrd teńgeni, al 2022 jyly 112 mlrd teńgeni quraǵan.
Budan bólek ol qazir Astanada jalpy quny 265,7 mlrd teńge bolatyn 33 ınvestıtsııalyq joba júzege asyrylyp jatqanyn atap ótti.
— Aldaǵy eki-úsh jylda 24 qonaqúıdiń qurylysy josparlanyp otyr. Olardyń qatarynda Swissôtel, Holiday Inn, Wyndham Garden sekildi tórt jáne bes juldyzdy qonaqúıler bar. Sonymen qatar «Les» ekoparki, balalar lageri, kórme ortalyǵy, jol boıyndaǵy servıstik nysandar men basseıni bar demalys saıabaǵy sııaqty týrıstik ınfraqurylym jobalary iske asyrylady, — dedi basqarma basshysynyń orynbasary.
Onyń sózinshe, bul jobalar týrısterge arnalǵan ınfraqurylymdy keńeıtip, elordanyń týrıstik tartymdylyǵyn arttyrýǵa múmkindik bermek.
Eske salaıyq, bıyl Astanaǵa kelgen týrıster sany 12 paıyzǵa óskeni belgili.
