Týrızmge kedergi qubylysty tótenshe oqıǵa retinde qabyldaý kerek - Qojaǵapanov

ASTANA. QazAqparat - Bul týraly búgin Astanada Týrızm jónindegi keńestiń otyrysynda QR Mádenıet jáne sport vıtse-mınıstri Erlan Qojaǵapanov málim etti, dep habarlaıdy QazAqparat.

«Búginde álemde, onyń ishinde kórshiles elderde týrıst úshin básekelestik tartys bastaldy. Bizdiń jaqynda ornalasqan básekelesterimiz osy salany damytýda aıtarlyqtaı belsendilik tanytýda. Osy oraıda bul elder týrıstik jańa ónimderdi ázirleýge erekshe mán berip otyr, sondyqtan bizge týrısterge qolaıly jaǵdaı jasaýda ozyp shyǵý mańyzdy bolyp tur», - dedi vıtse-mınıstr.

Bul turǵyda Qojaǵapanov el turǵyndary barynsha qonaqjaılylyq tanytýy qajettigin atap ótti.

«Kez kelgen teris fakti nemese bizdiń otandastar tarapynan kishkene túsinbestiktiń ózi, sondaı-aq aıyppul salýǵa tyrysqan polıtseıdiń áreketi, shekaralyq jáne kedendik baqylaýdy uzaq ótý jaǵdaıy, daıashylardyń aǵylshyn tilinde tapsyrys qabyldaı almaýy sekildi oqıǵalar sheteldik týrısterdi tartýǵa aıtarlyqtaı keri áser etýi múmkin. Sondyqtan Qazaqstandaǵy týrıstik saıahattarǵa baılanysty teris ımıdjdiń qalyptasýyna jol berýge bolmaıdy. Osy oraıda kez kelgen mundaı teris qubylysty tótenshe oqıǵa retinde qabyldaýymyz kerek. Al buǵan jol bergender memleketke qarsy áreket jasaǵanyn jáne eldiń múddesine nuqsan keltirgenin túsinýi tıis. Atap aıtqanda, bul sharalardyń barlyǵy tek sheteldik meımandarǵa qatysty ǵana emes, sonymen qatar birinshi kezekte ózimizdiń azamattarǵa jasalýy kerek», - deıdi ol.

Vıtse-mınıstrdiń paıymynsha, týrıstik klımatty jaqsartý turǵysynda júıeli qadamdarǵa barý qajet.