Týrızmge ınvestıtsııa salǵan kásipkerlerdiń shyǵyny ishinara óteledi

ASTANA. QazAqparat – Memleket týrıstik obektilerdi salǵan kásipkerlerdiń shyǵyn ishinara óteıdi, dep habarlaıdy QazAqparat Mádenıet mınıstrligine silteme jasap.

«Biz Qazaqstannyń týrıstik ınfraqurylymyn damytýǵa ınvestıtsııa salatyn kásipkerlerge qoldaý kórsetemiz. Jańa tehnıkany satyp alýǵa jumsalǵan shyǵyndardyń bir bóligin óteý shynymen de iri josparlardy iske asyrýǵa túrtki bolady. Kásipkerge tek ótinim berip, óz jobasyn usynýy kerek»,-dedi Mádenıet jáne sport vıtse-mınıstri Erjan Erkinbaev.

Mınıstrliktiń málimetinshe, birinshiden, týrıstik obektilerdi salý jáne rekonstrýktsııalaý úshin kásipkerlerge onyń shyǵyndarynyń 10% óteledi. Ekinshiden, jol boıyndaǵy servıs obektilerin (qonaq úıler, janarmaı quıý beketteri, saýda jáne tamaqtaný pýnktteri jáne t.b.) salǵan kásipkerlerge de osy mólsherde sýbsıdııa qarastyrylǵan.

Úshinshiden, 8 nemese odan da kóp oryndyq týrıstik avtobýstardy satyp alý úshin ótemaqy 25% quraıdy. Tórtinshiden, taý shańǵysy kýrorttaryna arnalǵan jabdyqtardy satyp alý úshin de dál osy mólsherde ótemaqy qarastyrylǵan. Sondaı-aq sanıtarlyq-gıgıenalyq toraptardy ustaý sýbsıdııalanady (aıyna 83 000 teńge)», - delingen habarlamada.

Mysaly, Aqmola oblysyndaǵy Zerendi aýdanynda 75 mln teńgege balalarǵa arnalǵan saýyqtyrý ortalyǵy qaıta jańartylyp jatyr. Kásipkerge joba qunynyń 10% óteledi. Aqmola oblysy men Shyǵys Qazaqstan oblysynyń eki kásipkerine týrıstik avtobýstar satyp alǵany úshin 11 mln teńge óteledi. Sondaı-aq, bıyl elimiz boıynsha 567 sanıtarlyq-gıgıenalyq torapty ustaýǵa arnalǵan shyǵyndardy óteý kózdelgen.