Týrızmdi damytýdyń áli uzaq merzimdik strategııasy joq - Muhıt Saımasaev
ALMATY. 24 mamyr. QazAqparat - Bıyl týrızmdi damytý týraly 2020 jylǵa deıingi salalyq baǵdarlama jasaý josparlanyp otyr.
Bul búgin Almatyda ótken «Almaty qalasynda týrızmdi damytýdyń qazirgi jaǵdaıy men keleshegi» degen taqyryptaǵy alqaly jıynda sóz boldy.
«Indýstrııa jáne jańa tehnologııalar mınıstrliginiń týrızm salasyndaǵy jospary eń aldymen damý núktesin anyqtaý. Salanyń ósý úderisi jalǵasqanymen onyń jańa deńgeıge shyǵýyna kedergi keltiretin birqatar júıeli máseleler bar. Ony damytýdyń negizgi máselesi salalyq baǵdarlamaǵa qaramastan áli uzaq merzimdik strategııa joq. Bul másele salanyń júıelik damýy, ınvestıtsııalyq áleýetin anyqtaý, damý núktesi, ınvestıtsııa tartý strategııasy jáne memlekettiń ınvestorlarmen ózara árekettestik modeline de qatysty bolyp otyr», - deıdi QR Indýstrııa jáne jańa tehnologııalar mınıstrliginiń týrızm ındýstrııasy komıteti tóraǵasynyń orynbasary Muhıt Saımasaev. Onyń aıtýynsha, qoldanystaǵy týrıstik aımaqtardyń tıisti ınfraqurylymynyń damýy men áleýeti álsiz. Bul eń aldymen týrısterdi asa qymbat emes qolaıly tasymaldaýmen qamtamasyz etý. Oǵan avtojoldar, áýejaılar men shaǵyn avıatsııany mysalǵa keltirýge bolady. Sondaı-aq týrıster úshin aqparattyq ınfraqurylymdar da jetkiliksiz bolyp otyr. Internet portaldardan bastap, brondaý jelisi, ınnovatsııalyq dúńgirshekter, jol kórsetkishteri men gıdterge deıin. Sondyqtan qazir birneshe shet tilderinde ulttyq týrıstik portal jasaý máselesi qozǵalýda. Jergilikti atqarý organdary men jumys naqty bólingen mindetter men úılestirýdiń joqtyǵyn da kórsetip otyr.
