Týrızmdi damytýdyń 2020 jylǵa deıingi salalyq baǵdarlamasyn ázirleý bıyl aıaqtalady - Á.Isekeshev
ASTANA. 24 sáýir. QazAqparat - Bıylǵy qarashanyń aıaǵyna qaraı Indýstrııa jáne jańa tehnologııalar mınıstrligi Týrızmdi damytýdyń 2020 jylǵa deıingi salalyq baǵdarlamasyn ázirleý boıynsha jumystardy aıaqtaıdy.
Bul týraly búgin selektorlyq rejimdegi Úkimet otyrysynda elimizdegi týrızm salasyn damytý máselesi boıynsha baıandama jasaǵan atalǵan vedomstvonyń basshysy Áset Isekeshev málim etti.
«Elbasynyń tapsyrmasy aıasynda Úkimet mınıstrlikke Týrızmdi damytýdyń 2020 jylǵa deıingi baǵdarlamasyn ázirleý maqsat-mindetin júktedi. Salany damytýdyń aldyn ala júıeli jospary daıarlanýda. Bizdiń baǵdarlama jyl sońyna qaraı bekitiledi dep úmittenemiz»,-dep atap ótti mınıstr.
Á. Isekeshevtiń sózine qaraǵanda, maýsymnyń sońyna qaraı mınıstrlik ekonomıkany damytý boıynsha memlekettik komıssııanyń qaraýyna salany damytýdyń uzaqmerzimdi tujyrymdamasyn engizýdi josparlap otyr. Sonymen qatar, qyrkúıektiń sońyna deıin óńirlik jobalardyń konkýrsy júrgizilip, memlekettik qoldaý kórsetý tetikteriniń qarjylyq-ekonomıkalyq saraptama jasaý turǵysyndaǵy jumystary aıaqtalady.
