Týrızmdi damytý 2020 jylǵa qaraı 100 myńnan astam turaqty jumys ornyn ashýǵa múmkindik beredi - Á.Isekeshev
ASTANA. 6 qarasha. QazAqparat - Týrızm salasyn damytý 2020 jylǵa qaraı 100 myńnan astam turaqty jumys ornyn ashýǵa múmkindik beredi.
Bul týraly búgin QR Prezıdenti janyndaǵy Ortalyq kommýnıkatsııalar qyzmetine ótken brıfıngte Premer-Mınıstrdiń orynbasary - Indýstrııa jáne jańa tehnologııalar mınıstri Áset Isekeshev aıtty.
Mınıstrdiń atap ótýinshe, týrızmdy damytý azamattardy jumyspen qamtyp, shaǵyn jáne orta bıznestiń qarqyndy damýyna úles qosýǵa qaýqarly salalardyń biri bola alady. «Sondyqtan da biz bul jumystardy birneshe bólike bóldik. Birinshisi, bul Qazaqstanda paıda bolyp, damýy yqtımal ulttyq klasterler. Olardyń ishinde áleýettisi beseý. Árıne, onyń alǵashqysy Astana tóńireginde, Býrabaımen, Qorǵaljynmen jáne irgeles jatqan óńirlerdi shoǵyrlandyrady. Ekinshisi, Almaty men Almaty oblysynyń tóńireginde. Úshinshisi - Jibek joly, ıaǵnı birinshe óńirdi biriktiretin Ońtústik Qazaqstan oblysy. Tórtinshisi - Shyǵys Qazaqstan. Al sońǵysy - Kendirli, ıaǵnı jaǵajaı týrızmin damytý. Bizderdiń bularmen qosa óńirlik týrızmdi damytý baǵytynda da jumys istegendigimiz túsinikti», - dedi ol.
Á.Isekeshevtiń aıtýynsha, óńirlerde týrızmdi damytýǵa baǵyttalǵan shamamen 20 shaǵyn joba júzege asyrylýda.
«Bizde óte tamasha oryndar óte kóp. Ásirese, otanshyldyqty damytýǵa septigin tıgizetin ishki týrızmdi gúldendirý baǵytyn ustanyp otyrmyz. Shamamen 2020 jylǵa deıin memlekettiń tolyqqandy qoldaýynyń arqasynda týrızm 100 myńnan astam turaqty jumys oryndaryn ashýǵa septigin tıgizedi dep oılaımyz», - dedi mınıstr.
