Týrızmdegi jeńildikter táýekeldi moınyna alǵandarǵa berilýi tıis – sarapshy

ASTANA. KAZINFORM – Týrızm salasyna bólinetin memlekettik qoldaýdy nelikten negizgi táýekelderdi moınyna alǵan kásipkerlerge berý mańyzdy? Bul týraly «Týrıstik qamqor» korporatıvtik qory men Týroperatorlar qaýymdastyǵynyń tóraǵasy Inna Reı BIZDIÑ ORTA podkastynda aıtyp berdi. 

Inna Reıdiń aıtýynsha, elimizde týrızmdi qoldaýdyń kóp sharalary iske asyrylyp jatyr. Alaıda olar túrli baǵdarlamalarǵa shashyrap ketkendikten, tıimdiligin baıqaı bermeımiz.

– Eń qyzyqty sharalardyń biri – kirmelik týrızmin (memleket aýmaǵynda turaqty turmaıtyn adamdardyń memleket sheginde saıahattaýy) sýbsıdııalaý. Óıtkeni sheteldik týrısterdi tartqany úshin belgili bir soma tólenedi. El ekonomıkasyna úles qosqan árbir týrıst boıynsha qujattardy arnaıy komıssııa qaraıdy. Bul jerde týrıstiń kelýi tek týroperator úshin emes, jalpy jurtshylyq úshin tıimdi ekenin túsiný kerek, - dedi sarapshy.

Sonymen qatar ol Qazaqstanǵa mundaı sýbsıdııa berý tásilin qaıta qaraý qajet dep esepteıdi.

– Memlekettik qoldaý eń aldymen elge týrısterdi turaqty túrde, tym bolmasa maýsym kezinde, tipti jyl boıy úzdiksiz tartýdy moınyna alǵandarǵa berilýi kerek. Óıtkeni ol josparlaǵan týrónimi tolyq satylsa da, satylmasa da, iske aqsha tigip, qarjylyq táýekelge barady. Osyndaı jaǵdaıda jumys isteıtin kásipkerlerge kómek aýadaı qajet, - dep atap ótti Inna Reı.

Sarapshynyń túsindirýinshe, týrıster aǵynynyń turaqtalýy ınvestorlar úshin de aldyn ala boljam jasaýǵa múmkindik beredi. Eger kásipkerler óńirge belgili bir mólsherde qonaqtardyń jıi keletinine kózi jetse, olar ınfraqurylymǵa, qonaqúıler salýǵa, qyzmet kórsetý sapasyn jaqsartýǵa qoryqpaı qarjy salady.

Budan bólek aýyl adamdary da baý-baqshasyn egip, malyn baǵyp, óz ónimderin ótkizetin naryq qalyptasady.

Osylaısha, aýyl men qala arasyndaǵy berik ekonomıkalyq baılanys ornaıdy.

Inna Reıdiń pikirinshe, jeńildikter tek jappaı týrızmdi qamtamasyz etip, uzaq merzimdi josparmen jumys isteıtin iri týroperatorlarǵa berilýi tıis.

Qarajattyń basqa maqsatqa jumsalýy nemese qoldaýdyń tek birdi-ekili kompanııanyń qolyna ótip ketýi sııaqty qaýip bar. Buǵan qatysty sarapshy mundaı protsesterdi baqylaýǵa alý ońaı ekenin aıtty.

– Búginde týrızm salasynda keremet serpilis jasaǵan elderdiń barlyǵy da osyndaı qoldaý tetikteri arqyly ótken. Bul - álemdik tájirıbede burynnan bar, synalǵan tásil, - dep túıindedi ol. 

Eske sala keteıik, buǵan deıin Aqmola oblysy týrısterge ne usynatynyn jazǵan edik.