Týrızmdegi túıtkil: birqatar laýazymdy tulǵa jaýapkershilikke tartyldy
ASTANA. KAZINFORM – Memleket basshysy Úkimetke tez arada eldegi barlyq týrıstik baǵyttyń jaǵdaıyn rettep, olqylyq jibergen jaýaptylardy jazalaýdy tapsyrǵan edi. Kýrorttyq aımaqtardy ınspektsııalaý jumysy nátıjesinde sharalar qabyldanyp, birqatar laýazymdy tulǵalar jaýapkershilikke tartyldy. Bul týraly Úkimettiń baspasóz qyzmeti málim etti.
Memleket basshysynyń týrıstik sala máseleleri jónindegi tapsyrmasyna sáıkes Premer-mınıstrdiń orynbasary Ermek Kósherbaevtyń basshylyǵymen vedomstvoaralyq jumys toby quryldy.
Onyń quramyna týrızm jáne sport, kólik, ishki ister, ekologııa jáne tabıǵı resýrstar, sý resýrstary jáne ırrıgatsııa, densaýlyq saqtaý mınıstrlikteriniń jáne basqa da ýákiletti memlekettik organdardyń basshylary kirdi.
10-12 shildede Almaty, Qaraǵandy, Jetisý jáne Abaı oblystaryna ınspektsııalyq sapar barysynda birqatar júıeli zań buzýshylyqtar anyqtaldy.
Jumys tobynyń músheleri týrıstermen kezdesýler ótkizip, Qapshaǵaı sý qoımasyndaǵy, Alakól jáne Balqash kólderindegi ınfraqurylymmen tanysty. Azamattardyń týrıstik ınfraqurylymnyń jaı-kúıine, servıstiń jetkiliksiz deńgeıine jáne qajetti qaýipsizdik sharalarynyń bolmaýyna qatysty habarlamalary rastaldy.
Ásirese, jergilikti atqarýshy organdar basqaratyn kommýnaldyq jaǵajaılardyń jaǵdaıy erekshe alańdaýshylyq týǵyzdy. Onda abattandyrý normalaryn buzý, chek bermeı jumys isteıtin bıznes sýbektilerinde kassalyq tártiptiń bolmaýy, sondaı-aq sanıtarııalyq talaptar men qaýipsizdik normalaryn elemeý faktileri tirkeldi.
Inspektsııa qorytyndysy boıynsha jáne Prezıdenttiń tapsyrmasyn oryndaý úshin jaýapty laýazymdy tulǵalarǵa qatysty tártiptik jaza qoldanyldy:
— týrızmdi damytýǵa jaýapty týrızm jáne sport vıtse-mınıstrine, sondaı-aq Almaty, Qaraǵandy, Abaı jáne Jetisý oblystary ákimderiniń orynbasarlaryna qatań sógis jarııalandy;
— Qonaev, Balqash qalalarynyń, Alakól, Maqanshy aýdandarynyń ákimderine, sondaı-aq aýyldyq okrýgterdiń ákimderine sógis jarııalandy;
— kásipkerlikke, týrızmge, qorshaǵan ortany qorǵaýǵa, sáýlet pen saýdaǵa jaýapty oblystyq basqarmalardyń basshylaryna jazalaý sharalary qoldanyldy;
— ekologııa jáne tabıǵı resýrstar, densaýlyq saqtaý, qarjy, sý resýrstary jáne ırrıgatsııa, saýda jáne ıntegratsııa, kólik mınıstrlikteriniń aýmaqtyq bólimsheleriniń basshylary jaýapkershilikke tartyldy.
Jergilikti jerlerde ortalyq memlekettik organdar ókilderiniń qatysýymen kóshpeli tekserýler júrgizilýde. Tekserý qorytyndysy boıynsha týrıstik ınfraqurylymdy damytýdyń Jol kartasy ázirlenetin bolady, onda saladaǵy júıelik problemalardy joıý jónindegi birinshi kezektegi sharalar aıqyndalady.
Budan basqa, jumys tobynyń bazasynda týrıstik qyzmetterdiń sapasyn arttyrý, kýrorttyq aımaqtardy abattandyrý jáne jergilikti jerlerde quqyqtyq tártipti qamtamasyz etý jónindegi jumysty turaqty negizde úılestiretin Jobalyq keńse jasaqtaldy.
Eske sala keteıik, buǵan deıin Ermek Kósherbaev Alakól kóliniń jaǵalaýyndaǵy demalys aımaqtaryn teksergen bolatyn.