Týrızmdi memlekettik qoldaý: qandaı ózgeris engizilip jatyr
ASTANA. KAZINFORM – Týrızm jáne sport mınıstrligi elimizde týrızmdi memlekettik qoldaý tetikteri jetildirilip jatqanyn habarlady.
Engizilgen ózgerister bıylǵy naýryz aıynda kúshine engen «Qazaqstan Respýblıkasyndaǵy týrıstik qyzmet týraly» zańnyń normalaryna sáıkestendirýge baǵyttalǵan. Negizgi maqsat – bıznes úshin rásimderdi túsinikti etý, ákimshilik kedergilerdi azaıtý jáne bıýdjet qarajatynyń tıimdi paıdalanylýyn qamtamasyz etý.
Kids Go Free baǵdarlamasy: týroperatorlar usynatyn qyzmetterdiń sapasyn arttyrý maqsatynda týrıstik ónimge qoıylatyn talaptar naqtylandy. Týrıstik ónimdi ishki týrızm salasynda qyzmet kórsetetin týroperator qalyptastyrýy, oǵan balanyń ekonom-klass boıynsha eki baǵyttaǵy áýe tasymaly engizilýi jáne keminde eki tún qonaqúıde ornalastyrý qarastyrylýy tıis. Sonymen qatar týrdyń tólengenin jáne balany alyp júretin adamnyń týystyq qatynasyn rastaıtyn qujattardy usyný mindetteledi.
Kirý týrızmi salasyndaǵy týroperatorlarǵa beriletin sýbsıdııalar: elge keletin týrısterden túsetin ekonomıkalyq tıimdilikti arttyrý maqsatynda sýbsıdııa alý úshin sheteldik týrıstiń Qazaqstanda bolý merzimi keminde alty tún bolyp belgilendi. Bul halyqaralyq tájirıbege sáıkes keledi jáne bıýdjet qarajatyn tıimdi paıdalanýǵa múmkindik beredi. Aıta ketý kerek, buǵan deıin qoldanysta bolǵan talap pandemııadan keıingi kezeńde kirý týrızmin qoldaý maqsatynda engizilgen bolatyn. Búginde elimizge keletin sheteldik týrıster aǵyny tolyq qalpyna kelip qana qoımaı, 2019 jylǵy kórsetkishten de asty. Osyǵan baılanysty memlekettik qoldaý uzaq merzimdi saparlardy yntalandyrýǵa baǵyttalady. Týroperatorlarǵa tólenetin sýbsıdııa kólemi burynǵydaı ár týrıst úshin 15 myń teńge deńgeıinde saqtaldy. Bul óńirlerde sheteldik týrısterdiń turýǵa, tamaqtanýǵa, ekskýrsııalar men ózge de qyzmetterge jumsaıtyn shyǵyndarynyń artýyna yqpal etedi dep josparlanǵan.
Sanıtarııalyq-gıgıenalyq toraptar: sanıtarııalyq-gıgıenalyq toraptardyń sapaly jumysyn qamtamasyz etý úshin sýbsıdııalanatyn shyǵystardyń naqty tizbesi aıqyndaldy. Oǵan tazalaý, dezınfektsııalaý, kommýnaldyq qyzmetter, sýmen jabdyqtaý, jaryqtandyrý, qaldyqtardy shyǵarý jáne paıdalaný shyǵyndary kiredi. Sýbsıdııa mólsheri burynǵydaı aıyna 83,3 myń teńge kóleminde saqtaldy. Sonymen qatar nysandardyń naqty jumysyn baqylaý kúsheıtilip, tekserýler júrgizý, foto jáne beınetirkeý, sondaı-aq turaqty monıtorıng jasaý kózdelgen.
Infraqurylymdyq jobalar: týrıstik ınfraqurylymdy memlekettik qoldaýdyń qoldanystaǵy sharalary saqtaldy. Memleket taý shańǵysy kýrorttaryna arnalǵan jabdyqtar men tehnıkanyń qunynyń 25 paıyzyn, týrıstik avtobýstardyń qunynyń 25 paıyzyn, sondaı-aq jol boıyndaǵy servıs nysandaryn, vızıt-ortalyqtar men týrısterdi ornalastyrý oryndaryn salýǵa jumsalǵan shyǵyndardyń 10 paıyzyn óteýdi jalǵastyrady. Sonymen qatar qoldaý kórsetiletin nysandar men jabdyqtardyń tizbesi júıelenip, qujattarǵa qoıylatyn talaptar, ótinimderdi qaraý merzimderi jáne sheshim qabyldaý tártibi naqtylandy. Bul memlekettik qoldaý tetikteriniń ashyqtyǵyn arttyryp, bıznes úshin rásimderdi túsinikti etedi.
Basym týrıstik aýmaqtar: basym týrıstik aýmaqtardy aıqyndaý jónindegi ókilettikter óńirlik deńgeıge berildi. Endi jergilikti atqarýshy organdar mundaı aýmaqtardy ózderi belgilep, olardyń shekarasyn aıqyndaı alady jáne ár óńirdiń týrıstik áleýetin eskere otyryp sheshim qabyldaıdy. Bul týrıstik áleýeti joǵary aýmaqtardy jedel damytýǵa jáne olardyń erekshelikterin tıimdi eskerýge múmkindik beredi.
Qabyldanǵan ózgerister týrızmdi memlekettik qoldaýdyń tıimdi ári ashyq júıesin qalyptastyrýǵa baǵyttalǵan. Olar bir jaǵynan bıznes úshin rásimderdi jeńildetse, ekinshi jaǵynan bıýdjet qarajatynyń maqsatty ári tıimdi paıdalanylýyna baqylaýdy kúsheıtedi. Ózgeristerdi ázirleý barysynda SJTS nátıjeleri (sybaılas jemqorlyq táýekelderine syrtqy taldaý), quqyq qoldaný tájirıbesi, sondaı-aq bıznes qaýymdastyǵy men jergilikti atqarýshy organdardyń usynystary eskerildi.
Aıta keteıik, qazir medıtsınalyq qyzmet alý maqsatynda Qazaqstanǵa keletin shetel azamattaryn esepke alýdyń biryńǵaı tásilderin qalyptastyrý boıynsha jumystar júrgizilip jatyr.
