Týrızmdi damytýǵa arnalǵan zań: qandaı ózgerister bolady
ASTANA. KAZINFORM — Qazaqstan týrızmdi qoldaýdy kúsheıtedi jańa zań sala men týrıster úshin neni ózgertedi.
Memleket basshysy «Qazaqstan Respýblıkasynyń keıbir zańnamalyq aktilerine týrıstik salany jáne balalar sportyn qoldaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Qujat týrıstik salany damytýǵa qolaıly jaǵdaı jasaýǵa jáne memlekettik qoldaý sharalarynyń tıimdiligin arttyrýǵa baǵyttalǵan.
— Jańa zań aıasynda týrızm zańnamasyndaǵy negizgi uǵymdar naqtylandy. Atap aıtqanda, gıd, ekskýrsovod, týrızm resýrstary jáne nysandary túsinikteri aıqyndaldy. Sonymen qatar gıdter men ekskýrsovodtardy mindetti túrde jeke kásipker retinde tirkeý talaby alynyp tastaldy. Bul mamandarǵa uıymdyq-quqyqtyq nysanyna qaramastan erkin qyzmet etýge múmkindik beredi.
Zańda vızıt-ortalyqtardyń qyzmeti alǵash ret quqyqtyq turǵydan retteldi. Olardyń quqyqtyq mártebesi, negizgi fýnktsııalary, ornalasý tártibi aıqyndalyp, týrızm nysandarynyń qataryna engizildi. Mundaı ortalyqtar týrısterge marshrýttar, qyzmetter men ınfraqurylym týraly aqparat beretin negizgi oryndarǵa aınalyp, otandyq jáne sheteldik qonaqtarǵa qyzmet kórsetýdiń biryńǵaı standartyn qamtamasyz etedi, — delingen habarlamada.
Qujatta týrıstik ınfraqurylymdy memlekettik qoldaý sharalary da naqtylandy. Atap aıtqanda, kásipkerlerdiń vızıt-ortalyqtar, jol boıyndaǵy servıs nysandary, ornalastyrý oryndaryn salý jáne qaıta jańǵyrtýǵa jumsaǵan shyǵyndarynyń bir bóligi óteledi. Sonymen qatar taý shańǵysy kýrorttaryna arnalǵan tehnıka men týrızm kóligin satyp alý shyǵyndaryn óteý múmkindigi qarastyrylǵan.
— Týroperatorlardy qoldaýdyń qosymsha tetikteri de engizildi. Olardyń shyǵyndaryn sýbsıdııalaý qarastyrylyp, týrıstik avtobýstardyń memlekettik shekaradaǵy ótkizý pýnktterinen ótý rásimin jedeldetý kózdelgen. Sondaı-aq balalar úshin ulttyq parkterge kirý tegin bolady, — delingen mınıstrlik habarlamasynda.
Zańda memlekettik qoldaý alǵan týrızm nysandarynyń qarajatyn maqsatty paıdalanýyn bes jyl boıy monıtorıngteý normasy engizildi. Budan bólek, týrıstik resýrstar aýmaǵyndaǵy sanıtarlyq-gıgıenalyq toraptardyń jaǵdaıyna baqylaý kúsheıtiledi.
Jalpy engizilgen ózgerister ishki jáne kelý týrızmin damytýǵa berik negiz qalyptastyrýǵa, salanyń ınvestıtsııalyq tartymdylyǵyn arttyrýǵa jáne bilikti mamandardy tartýǵa baǵyttalǵan. Sonymen qatar zań memlekettik organdardyń basym týrızm aýmaqtaryn aıqyndaý jáne aqparattyq ortalyqtardyń salany qoldaýǵa arnalǵan uıymdarmen ózara is-qımyl jasaý quzyretin bekitedi.
Qabyldanǵan sharalar týrıstik ınfraqurylymdy damytýǵa, qyzmet kórsetý sapasyn arttyrýǵa jáne Qazaqstannyń qaýipsiz ári tartymdy týrıstik baǵyt retindegi pozıtsııasyn nyǵaıtýǵa múmkindik beredi.
Eske salsaq týrızm men balalar sportyn qoldaý jónindegi zańǵa ózgerister engizilgen edi.