Týrızmdi damytý: Arqalyq, Úrjar, Balqash áýejaılaryna reıs ushyryla bastady
ASTANA. KAZINFORM — Kólik mınıstri Nurlan Saýranbaev jańa týrıstik maýsym qarsańynda el áýejaılarynyń jaı-kúıin baıandady.
Prezıdent tapsyrmasyna sáıkes, Katonqaraǵaı, Zaısan jáne Kendirli kýrorttyq aımaqtarynda jańa áýejaılar salynyp jatyr.
— Arqalyq qalasynyń áýejaıy qalpyna keltirilýde. Balqash áýejaıy kúrdeli jóńdeýden ótip, týrısterdi qabyldap jatyr. Úrjar áýejaıy jumys istep tur, bıyl ondaǵy termınaldy jańǵyrtý jumystary bastaldy, — dedi Kólik mınıstri Úkimettiń búgingi otyrysynda.
Jyl sońyna deıin áýe parkine taǵy 6 ushaq qosylady. Al 2030 jylǵa qaraı ushaqtar sany 160-qa jetedi.
— Іshki áýe reısteri óńirler arasyndaǵy baılanysty nyǵaıtý úshin óte mańyzdy. Jazǵy maýsymda Alakólge (Úsharal, Úrjar), Balqashqa, Túrkistanǵa, Býrabaıǵa (Kókshetaý) jáne Kaspıı teńizine (Aqtaý) avıamarshrýttar boıynsha reıster oryndalýda. Jazǵy kezeńde atalǵan baǵyttar boıynsha aptasyna 45 reıs oryndalyp júr, — dedi N. Saýranbaev.
Aıta keteıik, Qazaqstannyń týrıstik oryndaryna aparatyn joldar jóndeýden ótip jatyr. Bıyl Almaty-Óskemen jolyndaǵy jumystar aıaqtalyp, jol júrý ýaqyty 4 saǵatqa qysqarǵan.
Oǵan qosa, Qazaqstannyń 124 vokzaly jańǵyrtýdan ótip, jańadan salynyp jatyr. Qazir Kókshetaý, Býrabaı kýrorty, Qonaev, Kóktýma, Aqshı, Mankent, jáne Balqash-2 vokzaldarynda jumystar aıaqtaldy.
Suranystyń artýyna baılanysty eldegi týrıstik baǵyttarǵa qosymsha 15 poıyz júre bastaıdy.
