Týrızm jobalaryn sýbsıdııalaýdy 5 jyldan 10 jylǵa uzartý usynyldy

BÝRABAI. QazAqparat – Qazaqstanda týrızm jobalaryn sýbsıdııalaý merzimin 5 jyldan 10 jylǵa uzartý, qarjylandyrý lımıtterin 5 mlrd teńgege deıin ulǵaıtý usynyldy. Bul týraly Mádenıet jáne sport vıtse-mınıstri Erjan Erkinbaev aıtty, dep habarlaıdy QazAqparat tilshisi.

«Týrızmdegi ınvestıtsııalyq áleýetti damytýǵa basa mán beriledi. Bizdiń mınıstrlik «Qazaqtýrızm» kompanııasymen birlesip, ınvestıtsııalyq jobalar pýlyn qalyptastyrdy. Ótken jyldyń qorytyndysy boıynsha 40 mlrd teńgege 138 joba iske asyryldy. Bıyl 288 mlrd teńgege 115 jobany iske asyrý josparlanýda», - dedi Erjan Erkinbaev týrızmdi damytý máseleleri jónindegi kóshpeli alqa otyrysynda.

Sonymen birge, spıker mınıstrlikke qonaq úı basshylarynan ótinishter kelip túsetinin aıtty. Qazirgi jeńildetilgen nesıeleý mehanızmi belgilengen merzimde shyǵyndy aqtaýǵa múmkindik bermeıdi. Orta eseppen qonaq úı quny 10 jylda óteledi.

«Osyǵan baılanysty týrızm jobalaryn sýbsıdııalaý merzimderin 5 jyldan 10 jylǵa deıin uzartý, sondaı-aq qarjylandyrý lımıtterin 5 mlrd teńgege deıin ulǵaıtý qajet. Tıisti usynysty Ulttyq ekonomıka mınıstrligine jiberdik», - dedi vıtse-mınıstr.

Aıta keteıik, Býrabaı kýrortynda QR Mádenıet jáne sport mınıstrliginiń týrızm salasyn damytýǵa arnalǵan keńeıtilgen alqa otyrysy ótip jatyr. Ótken jyly 8 mln qazaqstandyq el ishinde saıahattaǵan jáne árbir tórtinshi týrıst ulttyq parkterge barǵan.

Sonymen birge, Erjan Erkinbaev ulttyq parkterde ınfraqurylym salý máselesin kótergen edi.