Týrızm jáne sport mınıstrligi «Aýyl sporty: búgini men erteńi» taqyrybynda respýblıkalyq semınar-keńes ótkizedi
ASTANA. Qyrkúıektiń 8-i. QazAqparat /Gúlmıra Álıakparova/ - Qyrkúıektiń aldaǵy 15-16 kúnderi QR Týrızm jáne sport mınıstrliginiń Sport komıteti QR Prezıdenti N. Nazarbaevtyń «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Joldaýynda belgilengen buqaralyq sportty damytý basymdyǵyn iske asyrý maqsatynda «Aýyl sporty: búgini men erteńi» taqyrybynda respýblıkalyq semınar-keńes ótkizedi.
Sharaǵa oblystardaǵy týrızm, dene tárbıesi men sport basqarlamalarynyń buqaralyq-sport jumysy bólimderiniń basshylary, aýdandyq deńgeıdegi dene shynyqtyrý men sport bólimderiniń basshylary, sport klýbtary, qoǵamdyq uıymdar sondaı-aq, Aýyl sharýashylyǵy men Bilim jáne ǵylym mınıstrliginiń, QR Statıstıka agenttiginiń ókilderi qatysady.
Semınar barysynda «Aýylda buqaralyq sportty damytý», «Nusqaýshy-ádiskerler aýyl sportynyń negizgi qurylymy retinde», «Aýyl sportynyń ınfraqurylymy. Jetistikteri, problemalary jáne bolashaǵy», «Vedomstvolyq statıstıkalyq esepti jetildirýdiń negizgi baǵyttary» taqyryptary kóterilip, baıandamalar tyńdalady.
Sonymen birge, buqaralyq sportty damytý, «Gımnastıka barlyǵy úshin» jobalary men «Aldaspan» saýyqtyrý ádistemeliginiń tanystyrylymdary ótkizilip, «Qazaqstandyq sporttyń tarıhy men jetistikteri» atty jyljymaly fotokórme uıymdastyrylady.
