Týrızm jáne sport mınıstrliginiń fýtbol klýbtaryndaǵy legıonerlerdi qysqartýǵa shamasy jetpeı otyr
ASTANA. KAZINFORM – Qazaqstan fýtbol federatsııasy 1 komandadaǵy legıonerler sanyn 8-den 12-ge deıin arttyryp jibergen. Al ony qaıta qysqartýǵa Týrızm jáne sport mınıstrliginiń shamasy jetpeı otyr.
Búgin Májilistiń Áleýmettik-mádenı damý komıteti ótkizgen is-sharada depýtat Qazybek Isa fýtbol klýbtarynyndaǵy legıonerler máselesin kóterdi.
«2021 jyly 1 jylda fýtbol klýbtaryna 133 mlrd teńge bólingen eken. Onyń 111 mlrd teńgesi – oblystyq bıýdjetterden. Osy aqshanyń bári legıonerlerdi baıytýǵa jumsalyp jatyr. Óıtkeni, 2021 jyly premer-lıgada 371 fýtbolshynyń 150-i legıoner bolǵan. Qorjynymyzǵa medal salatyn boks, kúres jáne aýyr atletıkanyń úsheýi qosylyp jumsaǵan aqshadan fýtbolǵa ketken aqsha úsh ese kóp. Onyń 80 paıyzy legıonerlerge ketedi. 30 jylda salǵanymyz jalǵyz stadıon. Al fýtbolǵa bólinetin bıýdjeti bizden 2 ese az Ózbekstan 10 stadıon salǵan jáne eýropalyq standarttarǵa saı», - degen ol elimizde fýtbolǵa bólinetin qarjy kólemine, legıonerler sanyna qatysty shekteý engizilgenimen, onyń saqtalmaıtynyn aıtty.
Týrızm jáne sport vıtse-mınıstri Serik Jarasbaevtyń sózine qaraǵanda, ótken jyldyń sońynda Fýtbol federatsııasy óz tarapynan legıonerlerge qatysty birqatar ózgeris engizgen.
«Buryn bir komandada 8 legıoner bolsa, qazir onyń sanyn 12-ge deıin arttyrdy. Onymen Týrızm jáne sport mınıstrligi kelispedi. Biz óz tarapymyzdan Fýtbol federatsııasyna bulaı jasamaý kerektigin aıtyp, birneshe hat jibergen edik. Búginde olar qoǵamdyq birlestik bolǵannan keıin ózderi búkil oblystyń klýbtaryn jınap, daýysqa salyp, bekitip aldy. Biraq qazirgi ýaqytta biz Prezıdent ákimshiligimen jáne Úkimetpen birlesip, bul máseleni qarastyryp jatyrmyz», - dedi vıtse-mınıstr.
Aıta keteıik, Májilistiń Áleýmettik-mádenı damý komıtetinde «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý, sondaı-aq normalardy shekten tys (shekten tys) zańnamalyq retteýdi alyp tastaý týraly» zań jobasy talqylandy.
