Týrızm jáne sport mınıstri Rýslan Qurbanovty marapattady
ASTANA. KAZINFORM – Týrızm jáne sport mınıstri Erbol Myrzabosynov semserlesýden ulttyq quramanyń jetekshi sportshylarynyń biri Rýslan Qurbanovpen jáne Qazaqstan semserlesý federatsııasynyń prezıdenti Mırbolat Ábýovpen kezdesti.
Kezdesý barysynda mınıstr otandyq sporttyń damýyna qosqan eleýli úlesi men halyqaralyq arenalardaǵy jetistikteri úshin Rýslan Qurbanovty vedomstvolyq «Dene shynyqtyrý men sportty damytýǵa sińirgen eńbegi úshin» tósbelgisimen marapattady.
Rýslan Qurbanov – elimizdegi eń tanymal semserlesýshilerdiń biri. Ol – 2023 jyly Mılanda ótken álem chempıonatynyń júldegeri, 2017 jylǵy Azııa chempıonatynyń jeńimpazy, Azııa oıyndarynyń birneshe dúrkin júldegeri, bıylǵy Gran-prı týrnıriniń fınalısi. Sondaı-aq Rýslan byltyr Parıjde ótken jazǵy Olımpııada oıyndarynda jeke jáne komandalyq esepte altynshy orynǵa ıe bolǵan edi.
Budan bólek, mınıstr Mırbolat Ábýovti elimizde semserlesý sportyn damytý jolyndaǵy kóp jylǵy eńbegi úshin «Qurmetti sport qyzmetkeri» ataǵymen marapattady.
Týrızm jáne sport mınıstrliginiń málimetinshe, kezdesý barysynda Erbol Myrzabosynov myqty sportshylar men kásibı sport menedjerlerin qoldaýdyń mańyzyn erekshe atap ótti. Óıtkeni olardyń jetistikteri Qazaqstannyń halyqaralyq deńgeıdegi bedelin arttyrýǵa eleýli úles qosady.
Aıta ketelik gran-prı týrnırinde kúmis medal alǵan qazaqstandyq semserlesýshi Rýslan Qurbanov aldaǵy maqsaty týraly aıtqan edi.