Týrızm jáne meıramhana isi mamandyǵy boıynsha oqıtyn stýdentterge 506 grant berilmek

ASTANA. QazAqparat – Mamandar daıarlaý boıynsha memlekettik tapsyrys aıasynda Halyqaralyq týrızm jáne meımandostyq ýnıversıtetiniń stýdentterine 506 grant berilmek. Bul týraly «Ashyq» NQA portalynda jarııalanǵan Mádenıet jáne sport mınıstriniń buıryǵynda jazylǵan, dep habarlaıdy QazAqparat tilshisi.

«Halyqaralyq týrızm jáne meımandostyq ýnıversıteti 2022-2023 oqý jylynda «Dene shynyqtyrý jáne sport» jáne «Dene shynyqtyrý jáne alǵashqy áskerı daıyndyq» pedagogıkalyq mamandyqtary boıynsha bilim alýshylardy qabyldamady. Sondyqtan Halyqaralyq týrızm jáne meımandostyq ýnıversıtetinde mamandardy daıarlaýdy sapaly josparlaý maqsatynda «Mádenıet jáne sport mınıstriniń mindetin atqarýshynyń 2022 jylǵy 16 tamyzdaǵy № 240 buıryǵyna» tıisti ózgerister engizý usynylady», - delingen qujatta.

Jańa ózgeriske sáıkes, endi atalǵan joǵary oqý ornynda memlekettik tapsyrys boıynsha bilim alýshylarǵa «týrızm» mamandyǵyna 357 grant berilmek. Onyń 297-si qazaq, 60-y orys tobyna arnalǵan. Al «tynyǵý» mamandyǵy boıynsha stýdentterge jalpy sany 54 grant usynylady. Sonymen qosa, endi «meıramhana isi jáne meımanhana bıznesi» mamandyǵynda memlekettik tapsyryspen 95 stýdent tegin oqıdy.

Aıta keteıik, qolnadystaǵy buıryqta atalǵan mamandyqtar boıynsha memleketttik tapsyryspen oqytý sharalary qamtylmaǵan. Buǵan deıin bul granttar dene shynyqtyrý jáne sport salasynda oqıtyndar úshin bereletin. Bıyl ol mamandyqtar boıynsha talapkerlerdi oqýǵa qabyldaý júrgizilmegendikten, tıisinshe grantar týrızm salasyna baǵyttalyp otyr.

Buıryq 30 qańtarǵa deıin kópshilik talqylaýda bolady.