Týrızm salasynda jumys isteıtinderdi salyqtan bosatý kerek pe
ASTANA. QazAqparat - Týrızm salasynda jumys isteıtinderdi 5-10 jylǵa salyqtan bosatý kerek. Mundaı usynysty Parlament Májilisindegi Úkimet saǵatynda depýtat Omarhan Óksikbaev málim etti, dep habarlaıdy QazAqparat tilshisi.
«Ekonomıkanyń bir salasyn, ıaǵnı mol áleýeti bar týrızmdi damytý - bizdiń el úshin eń qajetti qadam. Bul bıýdjetke de, elimizdiń bolashaǵyna da óte paıdaly sala. Búgin týrızm baǵyttaryn kóterý úshin ońtaıly usynystar da atap ótildi. Sonymen qatar, osy salada jumys isteımin degenderge kem degende 5 nemese 10 jylǵa búkil salyqtan bosatý qajet degen usynys aıtqym keledi. Sonda biz bul salany kóteremiz. Týrıster sany artqan kezde, 5-10 jyl almaǵan salyǵymyzdy eselep qaıtaratynymyzǵa ekonomıst retinde kepildik bere alamyn», - dep atap ótti O. Óksikbaev.
Osy oraıda ol atalǵan usynystardy aldaǵy ýaqytta zańnamada eskerý qajettigin qadap aıtty.
«Salyqty jeńildetý týraly aıtqanymyzda, Qarjy jáne Ulttyq ekonomıka mınıstrleri úreılene bastaıdy. Al dál osy usynystan qorqatyn eshteńe de joq. Osyny biz basty másele retinde qoıýmyz kerek jáne Salyq kodeksine kelesi keletin ózgeristerde bul usynysty alǵa tartqan jón», - dep túıdi depýtat.
