Týrızm salasyndaǵy negizgi kapıtalǵa salynǵan ınvestıtsııa kólemi 460 mlrd teńgeden asty

ASTANA. KAZINFORM – 2025 jylǵy maýsym aıynyń qorytyndysy boıynsha týrızm salasynda negizgi kapıtalǵa salynǵan ınvestıtsııa kóleminde oń kórsetkish baıqaldy. ıAǵnı, bıylǵy alǵashqy 6 aıda negizgi kapıtalǵa salynǵan ınvestıtsııa kólemi 460,2 mlrd teńgege jetken. 

Týrızm jáne sport mınıstrliginiń málimetinshe, bul soma 2024 jyldyń sáıkes kezeńimen salystyrǵanda (390,5 mlrd teńge) 18%-ǵa ósip otyr. 

Taldaý barysynda turǵyn úı jáne tamaqtaný, óner, oıyn-saýyq jáne demalys, kólik, jalǵa berý, týrızm bıznesi, sport jáne bos ýaqytty uıymdastyrý syndy 14 ekonomıkalyq qyzmet túri eskerildi.

Óńirler boıynsha ınvestıtsııa ósiminde kósh bastaǵandar:

Aqtóbe oblysy – ósim 342%

Ulytaý oblysy – ósim 154,7%

Qyzylorda oblysy – ósim 106,2%

Atyraý oblysy – ósim 96,6%

Almaty qalasy – ósim 74,7%

Pavlodar oblysy – ósim 62%

Bul kórsetkishter týrızm salasynyń qarqyndy damyp kele jatqanyn jáne sektordyń ınvestıtsııalyq tartymdylyǵy artyp otyrǵanyn kórsetedi. 

Eske sala keteıik, osyǵan deıin Týrızm jáne sport mınıstrligi elimizdiń týrıstik óńirlerine jasalǵan ınspektsııalyq sapary aıasynda Aqmola, Qaraǵandy, Mańǵystaý, Pavlodar, Shyǵys Qazaqstan, Almaty oblystary men Abaı jáne Jetisý oblystaryndaǵy týrıstik nysandardy aralap shyqqanyn jazǵan edik.