Týrızm salasyndaǵy qyzmettiń vahta merzimi 90 kúnge uzartyla ma
ASTANA. KAZINFORM – Premer-Mınıstrdiń orynbasary Tamara Dúısenova Májilis depýtattarynyń týrızm salasyndaǵy qyzmettiń vahta merzimin 90 kúnge uzartý usynysyna jaýap berdi.
«Eńbek jáne halyqty áleýmettik qorǵaý mınıstrliginiń aqparaty boıynsha Eńbek kodeksiniń 135-babyna sáıkes, vahtalyq ádis eger jumyskerdiń turaqty turǵylyqty jerine kúndelikti oralýy qamtamasyz etilmese, onda onyń turaqty turatyn jerinen tys jerde eńbek protsesin júzege asyrýynyń erekshe nysany sanalady. Vahtanyń uzaqtyǵy 15 kúntizbelik kúnnen aspaýǵa tıis. Qyzmetkerdiń jazbasha kelisimimen vahtanyń uzaqtyǵy ujymdyq, eńbek sharttaryna sáıkes 30 kúntizbelik kúnge deıin ulǵaıtylýy múmkin. Vahtanyń merzimin turǵylyqty jerinen tys jerde 90 kúnge deıin úzdiksiz jumys isteý merzimine uzartý eńbek jaǵdaılaryn nasharlatýy jáne qyzmetkerdiń densaýlyǵy men psıhofızıologııalyq jaǵdaıyna teris áser etýi múmkin. Sondaı-aq Qazaqstanda týrızm salasyndaǵy qyzmetti júzege asyrýdyń maýsymdyq sıpatyn eskere otyryp, vahta merzimin 90 kúnge uzartý da orynsyz», -dedi Tamara Dúısenova jaýabynda.
Onyń aıtýynsha, atalǵan problemany sheshý úshin eńbek zańnamasynyń qoldanystaǵy normasyn qoldaný usynylady. Bul rette onyń mynadaı úsh nuqsasy bar:
1-nusqa. Jumyskerlerdi turǵyn úımen qamtamasyz ete otyryp, maýsymdyq qyzmetker retinde bes kúndik jáne alty kúndik jumysqa 3 aıǵa ornalastyrý.
2-nusqa. Qyzmetkerlerdi aýysymdyq jumys rejımine maýsymdyq qyzmetker retinde turǵyn úımen qamtamasyz ete otyryp, 3 aıǵa ornalastyrý.
3-nusqa. Qyzmetkerlerdi turǵyn úımen qamtamasyz ete otyryp, maýsymdyq qyzmetker retinde ıkemdi jumys rejımine 3 aıǵa ornalastyrý. Ikemdi jumys ýaqyty rejımindegi kúndelikti jumystyń jáne (nemese) aptalyq jumystyń uzaqtyǵy kúndelikti (8 saǵat) jáne (nemese) aptalyq jumys ýaqytynyń (40 saǵat) normasynan kóp nemese az bolýy múmkin. Ikemdi jumys ýaqyty bar eseptik kezeń alty aıdan aspaýy kerek.
«Bul rette, jumys ýaqytynyń uzaqtyǵyna baılanysty eńbek jáne demalys rejıminiń saqtalýyn, demalys, mereke kúnderi jáne ústeme ýaqytta jumysqa aqy tóleýdi qamtamasyz etý qajet», - dedi vıtse-premer.